കൊവിഡ് വായുവിലൂടെ പകരാൻ സാധ്യതയെന്ന് വിദ​ഗ്ധർ: ലോകാരോ​ഗ്യ സംഘടന മാർ​ഗ നിർദേശം പുറപ്പെടുവിക്കണമെന്ന ആവശ്യം ശക്തം

സ്വന്തം ലേഖകൻ

വാഷിം​ഗടൺ: ലോകത്ത് ആശങ്കയേറ്റി കൊവിഡ് 19മായി ബന്ധപ്പെട്ട പുതിയ റിപ്പോർട്ടുകൾ പുറത്ത്. കൊവിഡ് 19 വായുവിലൂടെ പകരാൻ സാധ്യതയെന്ന് ആരോ​ഗ്യ വിദ​ഗ്ധർ ലോകത്തിന് മുന്നറിയിപ്പ് നൽകി. ഇതി സംബന്ധിച്ച മാർ​ഗ നിർദേശം ലോകാരോ​ഗ്യ സംഘടന ഉടൻ പുറത്തിറക്കണമെന്നും വിദ​ഗ്ധരുടെ സംഘടന ആവശ്യപ്പെട്ടു.

ഈ ഈവശ്യമുന്നയിച്ച് 32 രാജ്യങ്ങളിൽ നിന്നുള്ള 239 വിദ​ഗ്ധ ഡോക്ടർമാർ ലോകാരോ​ഗ്യ സംഘടനക്ക് കത്ത് നൽകി. അതേസമയം ഇത് സംബന്ധിച്ച ശാസ്ത്രീയമായ പഠനം ആവശ്യമാണെന്നും, ഇത് മുൻ നിർത്തി ലോകാരോ​ഗ്യ സംഘടന കൊവിഡ് പ്രോട്ടോകോൾ കൂടുതൽ കർശനമാക്കണമെന്നും വിദ​ഗ്ധർ ആവശ്യപ്പെട്ടു. നിലവിലെ സ്ഥിതിയനുസരിച്ച് കൊവിഡ് ബാധിതനായ ആളുമായി അടുത്ത സമ്പർക്കം പുലർത്തുകയോ രോ​ഗി സ്പർശിച്ച പ്രതലത്തിലൂടെയുമാണ് രോ​ഗം പകരുക എന്നാണ് സ്ഥിരീകരിച്ചിട്ടുള്ളത്.

കൊവിഡ് വായുവിലൂടെ പകരുമോ എന്നതു സംബന്ധിച്ച് മാസങ്ങളായി നടന്ന് വരുന്ന പഠനങ്ങളാണ് ഇത് സാധൂകരിക്കുന്ന ചില തെളിവുകളിലേക്ക് എത്തിച്ചതെന്ന് ലോകാരോ​ഗ്യ സംഘടനക്ക് അയച്ച കത്തിൽ ഡോക്ടർമാർ വ്യക്തമാക്കി. ഇനിയും ഇത് സംബന്ധിച്ച വിശദമായ പഠനം ആവശ്യമാണെന്നും ഡോക്ടർമാർ ആവശ്യപ്പെട്ടു.