യാത്രക്കാർ ശ്രദ്ധിക്കുക…! ട്രാക്കിൽ അറ്റകുറ്റപ്പണി, കോട്ടയം വഴിയുള്ള ട്രെയിനുകൾ വൈകിയോടും

സ്വന്തം ലേഖകൻ

കൊച്ചി: ട്രാക്കിൽ അറ്റകുറ്റപ്പണികൾ നടക്കുന്നതിനാൽ കോട്ടയം വഴിയുള്ള ട്രെയിനുകൾ വൈകിയോടും. വൈക്കം റോഡിനും പിറവം റോഡിനുമിടയിലെ 19-ാം നമ്പർ ലെവൽക്രോസിലെ ഗർഡർ നീക്കുന്നതിനാൽ ഫെബ്രുവരി 29, മാർച്ച് ഒന്ന് ദിവസങ്ങളിൽ കോട്ടയം വഴിയുള്ള ചില ട്രെയിനുകൾ വൈകിയോടും.

കോട്ടയം – എറണാകുളം റൂട്ടിലോടുന്ന നാല് ട്രെയിനുകളാണ് രണ്ടു മണിക്കൂറോളം വൈകിയോടുനവ്‌നത്. വൈക്കം റോഡിനും പിറവം റോഡിനും ഇടയിൽ പാളത്തിലെ സ്റ്റീൽ ഗർഡർ മാറ്റി കോൺക്രീറ്റ് പുനഃസ്ഥാപിക്കുന്ന പ്രവൃത്തിയാണ് നടക്കുന്നത്.

അറ്റകുറ്റപ്പണി നടക്കുന്നതിനാൽ ഗാന്ധിധാമിൽനിന്നുള്ള നാഗർകോവിൽ എക്‌സ്പ്രസ് രണ്ടു മണിക്കൂർ പിറവം റോഡ് റെയിൽവേ സ്റ്റേഷനിൽ നിർത്തിയിടും. തുടർന്ന്, പിറവം റോഡ് – വൈക്കം റോഡ് റൂട്ടിൽ ഇതേ ട്രെയിൻ 35 മിനിറ്റ് വൈകിയോടും. മംഗളൂരുവിൽനിന്നുള്ള തിരുവനന്തപുരം എക്‌സ്പ്രസ് എറണാകുളം- കോട്ടയം റൂട്ടിൽ 1.35 മണിക്കൂറോളം വൈകിയോടും. മധുരയിൽനിന്ന് പുറപ്പെടുന്ന അമൃത എക്‌സ്പ്രസും നിലമ്പൂരിൽ നിന്നുള്ള രാജ്യറാണി എക്‌സ്പ്രസും 1.25 മണിക്കൂർ വീതം വൈകിയോടും.