വിവരാവകാശ പ്രവര്‍ത്തകന്റെ വീട് കയറി റിട്ട. എസ്.ഐയുടെ ആക്രമണം; കമ്പി വടി ഉപയോഗിച്ച് അമ്മയേയും മകനെയും മര്‍ദ്ദിച്ചു; എസ്.ഐയുടെ മകന്റെ അനധികൃത നിര്‍മ്മാണത്തിനെതിരെ പരാതി നല്‍കിയത് പ്രകോപനത്തിനിടയാക്കി

സ്വന്തം ലേഖകന്‍

കൊല്ലം: കരുനാഗപ്പള്ളിയില്‍ വിവരാവകാശ പ്രവര്‍ത്തകന്റെ വീട്ടില്‍ കയറി റിട്ടയേര്‍ഡ് എസ് ഐയുടെയും സംഘത്തിന്റെയും ആക്രമണം. വിവരാവകാശ പ്രവര്‍ത്തകന്‍ ശ്രീകുമാറിനെയും അമ്മ അമ്മിണിയമ്മയെയും ആണ് റിട്ടയേര്‍ഡ് എസ് ഐ റഷീദിന്റെ നേതൃത്വത്തില്‍ അഞ്ചംഗ സംഘം ആക്രമിച്ചത്.

കമ്പി വടി ഉപയോഗിച്ചായിരുന്നു ശ്രീകുമാറിനേയും അമ്മയേയും അഞ്ചംഗ സംഘം മര്‍ദിച്ചത്. റഷീദിന്റെ മകന്റെ അനധികൃത നിര്‍മാണത്തിനെതിരെ പരാതി നല്‍കിയതാണ് അക്രമത്തിന് കാരണമെന്ന് ശ്രീകുമാര്‍ ആരോപിക്കുന്നു.

റഷീദിനെ കസ്റ്റഡിയില്‍ എടുത്തു. എന്നാല്‍ ശ്രീകുമാറാണ് കമ്പിവടി ഉപയോഗിച്ച് അക്രമിക്കാന്‍ ശ്രമിച്ചതെന്നും റഷീദ് ഇത് പിടിച്ച് വാങ്ങി തടയാന്‍ ശ്രമിക്കുകയായിരുന്നുവെന്നും പൊലീസ് പറയുന്നു. ഇത് റിട്ട.എസ്.ഐയെ രക്ഷിക്കാനുള്ള ശ്രമത്തിന്റെ ഭാഗമാണെന്ന് വിമര്‍ശനം ഉയരുന്നുണ്ട്.