സബ് സ്റ്റേഷൻ ഓപ്പറേറ്റർമാർക്കായി എലിജിബിലിറ്റി പരീക്ഷ നടത്തുന്നതിനെതിരെ സംസ്ഥാന മനുഷ്യാവകാശ കമ്മീഷൻ

സ്വന്തം ലേഖകൻ

തിരുവനന്തപുരം: സബ് സ്റ്റേഷൻ ഓപ്പറേറ്റർമാർക്കായി എലിജിബിലിറ്റി പരീക്ഷക്കെതിരെ സംസ്ഥാന മനുഷ്യാവകാശ കമ്മീഷൻ. ഈ തസ്തികയിൽ ജോലി ചെയ്യുന്ന സ്ഥിരം ജീവനക്കാർക്ക് പരീക്ഷയില്ല പകരം കരാർ ജീവനക്കാരാണ് എലിജിബിലിറ്റി പരീക്ഷയ്ക്ക് അർഹർ. തുടർന്നാണ് ഇതിന്റെ മാനദണ്ഡങ്ങൾ വിശദീകരിക്കണമെന്ന് ആവശ്യപ്പെട്ട് കമ്മീഷൻ അധ്യക്ഷൻ ജസ്റ്റിസ് ആന്റണി ഡൊമിനിക് വൈദ്യുതി ബോർഡിന് നോട്ടീസയച്ചത്.

2018-19 മുതലാണ് കരാർ ജീവനക്കാർക്ക് എലിജിബിലിറ്റി ടെസ്റ്റ് നിർബ്ബന്ധമാക്കിയിരുന്നത്. ട്രാൻസ്മിഷൻ വിഭാഗം തിരുവനന്തപുരം, കോഴിക്കോട് ചീഫ് എഞ്ചിനീയർമാർ നാലാഴ്ചയ്ക്കകം റിപ്പോർട്ട് സമർപ്പിക്കണം. 800ൽ പരം ഇലക്ട്രിക്കൽ എഞ്ചിനീയറിംഗ് ബിരുദധാരികളാണ് കരാർ അടിസ്ഥാനത്തിൽ ജോലി ചെയ്യുന്നത്. ഇവർക്ക് മിനിമം കൂലി നടപ്പാക്കിയിട്ടില്ല.

അതേസമയം പരീക്ഷയിൽ 60 ൽ കൂടുതൽ മാർക്ക് നേടിയില്ലെങ്കിൽ അയോഗ്യരായി കണക്കാക്കും. 2019-20 വർഷവും എലിജിബിലിറ്റി ടെസ്റ്റ് എഴുതണമെന്ന് ബോർഡ് പറയുന്നുണ്ട്. ഇത് കരാർ തൊഴിലാളികളെ ഒഴിവാക്കാനുള്ള നീക്കത്തിന്റെ ഭാഗമാണെന്ന ആരോപണവും ഉയരുന്നുണ്ട്.