സംസ്ഥാനത്ത് മെഡിക്കൽ കോളജുകൾ കേന്ദ്രീകരിച്ച് അവയവക്കടത്ത് മാഫിയ ; അനധികൃത അവയവക്കടത്തിൽ സർക്കാർ ജീവനക്കാർക്കും പങ്കുണ്ടെന്ന് റിപ്പോർട്ട് ; സംഭവത്തിൽ ക്രൈംബ്രാഞ്ച് അന്വേഷണം ആരംഭിച്ചു

സ്വന്തം ലേഖകൻ

തിരുവനന്തപുരം : സംസ്ഥാനത്ത് കഴിഞ്ഞ രണ്ട് വർഷത്തിനിടെ നടന്നത് വ്യാപക അവയവക്കടത്ത് എന്ന് ക്രൈംബ്രാഞ്ച് റിപ്പോർട്ട്. ഈ അനധികൃത അവയവക്കടത്തിൽ സർക്കാർ ജീവനക്കാർക്കും പങ്കുണ്ടെന്നും റിപ്പോർട്ടിൽ പറയുന്നു.

അവയവ കച്ചവടവുമായി ബന്ധപ്പെട്ട് ക്രൈംബ്രാഞ്ച് കേസെടുത്തു.അവയവ കച്ചവടം തടയുന്നതിനുള്ള പ്രത്യേക നിയമ പ്രകാരമാണ് ക്രൈംബ്രാഞ്ച് കേസ് എടുത്തിരിക്കുന്നത്.

സംസ്ഥാനത്ത് രണ്ട് വർഷത്തിനിടെ വ്യാപകമായി ഇടപാടുകൾ നടന്നുവെന്ന് ക്രൈംബ്രാഞ്ച് കണ്ടെത്തിയിട്ടുണ്ട്. കിഡ്‌നി അടക്കമുള്ള അവയവങ്ങളാണ് നിയമ വിരുദ്ധമായി ഇടനിലക്കാർ വഴി വിൽക്കുന്നുണ്ട്. ഈ
അനധികൃത അവയവക്കടത്തിൽ സർക്കാർ ജീവനക്കാരും ഇടനിലക്കാരായി എത്തുന്നുണ്ട്.

ആളുകളെ കണ്ടെത്തിയാണ് അവയവ കച്ചവടം നടക്കുന്നത്. സർക്കാരിന്റെ വെബ്‌സൈറ്റുകളെ അട്ടിമറിച്ചുകൊണ്ടുള്ള പ്രവർത്തനമുണ്ട്. സർക്കാർ മെഡിക്കൽ കോളജ് കേന്ദ്രീകരിച്ച് മാഫിയ പ്രവർത്തിക്കുന്നുണ്ട്. എന്നാൽ ഈ അവയവക്കടത്ത് മാഫിയ ഏതൊക്കെ മെഡിക്കൽ കോളജ് വഴിയാണ് ഇത് നടക്കുന്നതെന്ന് റിപ്പോർട്ടിൽ കാണിച്ചിട്ടില്ല.

അന്വേഷണ റിപ്പോർട്ട് ക്രൈംബ്രാഞ്ച് ഐജി, സംസ്ഥാന പൊലീസ് മേധാവിക്ക് കൈമാറി. തൃശൂർ ക്രൈംബ്രാഞ്ച് എസ്പി സുദർശനാണ് അന്വേഷണ ചുമതല നൽകിയിരിക്കുന്നത്.