ജീവിതശൈലിയിലെ ചില മാറ്റങ്ങളാണ് ആർത്തവം ക്രമം തെറ്റുന്നതിന് പിന്നിൽ ; ആർത്തവം വൈകുന്നതിൻ്റെ കാരണങ്ങള്‍ ഇവയൊക്കെ…
സ്വന്തം ലേഖകൻ
സ്ത്രീകളില്‍ അവരുടെ പ്രത്യുല്പാദനത്തിൻറെ ഭാഗമായി നടക്കുന്ന ഒരു സ്വാഭാവിക പ്രക്രിയയാണ്‌ ആർത്തവം. ആർത്തവ സംബന്ധമായ നിരവധി പ്രശ്നങ്ങള്‍ പലരേയും അലട്ടാം.
മിക്ക സ്ത്രീകളും ആർത്തവം വൈകുന്നതും ആർത്തവത്തോടനുബന്ധിച്ചുള്ള ആരോഗ്യ പ്രശ്‌നങ്ങളുമുള്ളവരാണ്. ജീവിതശൈലിയിലെ ചില മാറ്റങ്ങളാണ് ആർത്തവം ക്രമം തെറ്റുന്നതിന് പിന്നിലെ ചില കാരണങ്ങള്‍.
Whatsapp Group 1 | Whatsapp Group 2 |Telegram Group
ആർത്തവം വൈകുന്നതിൻ്റെ കാരണങ്ങള്‍ എന്തൊക്കെയാണ്?
സമ്മർദ്ദം
അമിത സമ്മർദ്ദം ശരീരത്തില്‍ കോർട്ടിസോള്‍ എന്ന ഹോർമോണ്‍ പുറത്തുവിടാൻ കാരണമാകുന്നു. ഇത് ആർത്തവചക്രത്തെ ബാധിക്കുകയും ഹോർമോണ്‍ അസന്തുലിതാവസ്ഥയിലേക്ക് നയിക്കുകയും ചെയ്യുന്നു. ഇത് ക്രമരഹിതമായ ആർത്തവചക്രം ഉണ്ടാക്കുകയോ ആർത്തവം വൈകിപ്പിക്കുകയോ ചെയ്യുന്നുവെന്ന് ഗുരുഗ്രാമിലെ സികെ ബിർള ഹോസ്പിറ്റലിലെ ഗൈനക്കോളജിസ്റ്റായ ഡോ അരുണ കല്‍റ പറയുന്നു.
അമിതമായ വ്യായാമം
നിങ്ങള്‍ അമിതമായി വ്യായാമം ചെയ്യുകയാണെങ്കില്‍ ജാഗ്രത പാലിക്കണം. കാരണം അമിതമായ വ്യായാമം ആർത്തവചക്രത്തില്‍ മാറ്റങ്ങള്‍ക്ക് കാരണമാകും. ആർത്തവം വെെകുന്നതിലേക്ക് നയിച്ചേക്കാം.
ഹോർമോണ്‍ അസന്തുലിതാവസ്ഥ
ഹോർമോണ്‍ അസന്തുലിതാവസ്ഥ പ്രത്യേകിച്ച്‌ ഈസ്ട്രജൻ, പ്രൊജസ്ട്രോണ്‍ എന്നീ ഹോർമോണുകള്‍ ഉള്‍പ്പെടുന്നവ, ആർത്തവ ക്രമക്കേടുകളുടെ ഒരു സാധാരണ കാരണമായി അറിയപ്പെടുന്നു. ഈ ഏറ്റക്കുറച്ചിലുകള്‍ ആർത്തവത്തിന്റെ സമയം, ദൈർഘ്യം, തീവ്രത എന്നിവയെ ബാധിക്കും. കൂടാതെ ഹോർമോണ്‍ അസന്തുലിതാവസ്ഥ മലബന്ധം, വയറിളക്കം, മാനസികാവസ്ഥയിലെ മാറ്റങ്ങള്‍ തുടങ്ങിയ നിരവധി ലക്ഷണങ്ങളിലേക്ക് നയിച്ചേക്കാമെന്നും ക്യൂറസ് ജേണലില്‍ പ്രസിദ്ധീകരിച്ച പഠനത്തില്‍ പറയുന്നു.
ഭാരം കൂടുകയോ കുറയുകയോ ചെയ്യുന്നത്
ഭാരം കൂടുകയോ കുറയുകയോ ചെയ്യുന്നത് ഹോർമോണ്‍ സിന്തസിസിനെ ബാധിച്ചേക്കാം. ഇത് ക്രമരഹിതമായ ആർത്തവത്തിന് കാരണമാകുന്നതായി എൻഡോക്രൈനോളജി ആൻഡ് മെറ്റബോളിസം ജേണലില്‍ പ്രസിദ്ധീകരിച്ച പഠനത്തില്‍ പറയുന്നു.
വിവിധ ആരോഗ്യപ്രശ്നങ്ങള്‍
തൈറോയ്ഡ് തകരാറുകള്‍, പ്രത്യുല്‍പാദന പ്രശ്നങ്ങള്‍, പോളിസിസ്റ്റിക് ഓവേറിയൻ സിൻഡ്രോം (പിസിഒഎസ്) എന്നിവയുള്‍പ്പെടെയുള്ള പല രോഗാവസ്ഥകളും ആർത്തവ ക്രമക്കേടുകളോ കാലതാമസമോ ഉണ്ടാകാൻ കാരണമാകുമെന്ന് വിദഗ്ധർ പറയുന്നു.
