കെഎസ്ആര്ടിസി എം.ഡി ബിജു പ്രഭാകറിന്റെ നെതര്ലാന്ഡ്സ് യാത്രയുമായി ബന്ധപ്പെട്ട വിവാദങ്ങളില് പ്രതികരണവുമായി ഗതാഗത സെക്രട്ടറിയുടെ ഓഫീസ്
സ്വന്തം ലേഖകൻ
തിരുവനന്തപുരം; കെ.എസ്.ആര്.ടി.സി എം.ഡി ബിജു പ്രഭാകറിന്റെ നെതര്ലാന്ഡ്സ് യാത്രയുമായി ബന്ധപ്പെട്ട വിവാദങ്ങളില് പ്രതികരണവുമായി ഗതാഗത സെക്രട്ടറിയുടെ ഓഫീസ്.
നെതര്ലാന്സിലെ ആംസ്റ്റര്ഡാമില് മേയ് 11, 12 തീയതികളില് അഞ്ചാമത് ഇന്റര്നാഷണല് കോണ്ഫറന്സായ ക്ലീന് ബസ്സ് ഇന് യൂറോപ്പില് ഗതാഗത സെക്രട്ടറിയെന്ന നിലയിലാണ് ബിജു പ്രഭാകര് പങ്കെടുക്കുന്നതെന്നാണ് വിശദീകരിക്കുന്നത്. ഗതാഗത വകുപ്പ് സെക്രട്ടറിക്ക് പുറമെ , നഗരകാര്യ സെക്രട്ടറി, കെ.എസ്.ആര്.ടി.സി സി.എം.ഡി തുടങ്ങി അഞ്ചോളം അധിക ചുമതലകളും നിലവില് ബിജു പ്രഭാകര് വഹിക്കുന്നുണ്ട്.
ആംസ്റ്റര് ഡാമില് നടക്കുന്ന ഇന്റര്നാഷണല് കോണ്ഫറന്സില് പങ്കെടുക്കുന്നതിന് വേണ്ടി വിവിധ രാജ്യങ്ങളില് നിന്നുള്ള ഗതാഗത സെക്രട്ടറിമാര്, ട്രാന്സ്പോര്ട്ട് കമ്മീഷണര്മാര്, പൊതുമേഖലയില് ഉള്ള സ്റ്റേറ്റ് ട്രാന്സ്പോര്ട്ട് കോര്പ്പറേഷനുകളുടെ സി.ഇ.ഒമാര് തുടങ്ങിയവര്ക്ക് വളരെ നേരത്തെ തന്നെ ക്ഷണം ലഭിച്ചതുമാണ്.
Whatsapp Group 1 | Whatsapp Group 2 |Telegram Group
സാധാരണ ഡെലിഗേറ്റിന് 1200 യൂറോയാണ് (ഏകദേശം 1,10,000 രൂപ) ഫീസ് എന്നാല്, പ്രത്യേക ക്ഷണമുള്ള സര്ക്കാര് പ്രതിനിധികള്ക്ക് ഡിസ്കൗണ്ട് ഫീസായ 475 യൂറോ ( ഏകദേശം 45,000) രൂപ നല്കിയാല് മതി. ഇത് അനുസരിച്ച് ക്ഷണം ലഭിച്ചപ്പോള് ഗതാഗത / നഗരകാര്യ സെക്രട്ടറി എന്ന നിലയിലാണ് സംസ്ഥാന സര്ക്കാര് കോണ്ഫറന്സില് പങ്കെടുക്കാന് അനുവാദം നല്കിയത്.
കേരള ഗതാഗത സെക്രട്ടറിയെക്കൂടാതെ ഇന്ത്യയിലെ അഞ്ച് സംസ്ഥാനങ്ങളില് നിന്നുള്ള ഗതാഗത വകുപ്പിലേയും പൊതു മേഖലാ സ്ഥാപനങ്ങളിലേയും ഉദ്യോഗസ്ഥര് പങ്കെടുക്കുമെന്ന് സംഘാടകര് അറിയിച്ചിട്ടുണ്ട്. ഹിമാചല് ആര്.ടി.സി വൈസ് ചെയര്മാന് ആന്ഡ് എം.ഡി സന്ദീപ് കുമാര് , ഉത്തര്പ്രദേശ് ആര്.ടി.സി എംഡി രാജേന്ദ്ര പ്രതാപ് സിംഗ് , പൂനെ മാഹാനഗര് പഹിവഹന് മഹാമണ്ടല് ലിമിറ്റഡ് ജോയിന്റ് എം.ഡി ഡോ. ചേതന കേരൂറെ , അസോസിയേഷന് ഓഫ് സ്റ്റേറ്റ് റോഡ് ട്രാന്സ്പോര്ട്ട് അണ്ടര്ടേക്കിന്സ് ഡല്ഹി അസി. ഡയറക്ടര് പ്രഭുല് മഠ്, തെലുങ്കാനാ ഡെപ്യൂട്ടി ചീഫ് മെക്കാനിക്കല് എന്ജിനിയര് സന്തോഷ് കുമാര് പൊലാമല്ല എന്നിവരാണ് ഇന്ത്യയില് നിന്നും ഇതിനകം പങ്കെടുക്കാന് തീരുമാനിച്ചിരിക്കുന്നത്.
ഗതാഗത രംഗത്ത് ലോകത്തിലെ ഏറ്റവും പുതിയ കണ്ടുപിടുത്തങ്ങളും മാറ്റങ്ങളും എന്താണെന്ന് മനസിലാക്കുന്നതിന് വേണ്ടിയാണ് രാജ്യത്തെ 5 സംസ്ഥാനങ്ങളില് നിന്നും ഗതാഗത രംഗത്തെ പ്രമുഖര് ഇത്തരം കോണ്ഫറന്സുകളില് പങ്കെടുക്കുന്നത്. നഗരകാര്യ സെക്രട്ടറി എന്ന നിലയില് അവിടത്തെ നഗരകാര്യങ്ങളെക്കുറിച്ചും ഈ രംഗത്തുള്ളവരുമായി ആശയവിനിമയത്തിന് വേണ്ടിയുള്ള സാധ്യതയും ആരായും. ഇതിന് 100 ഡോളര് ( 7500 രൂപ )ഒരു ദിവസം നല്കുന്നത് 2017 ലെ , 5 വര്ഷം പഴക്കമുള്ള ഓര്ഡര് അനുസരിച്ചാണ്. ജി എ ഡി ഉപയോഗിച്ചാണ് ഈ കോണ്ഫറന്സില് പങ്കെടുക്കുന്നതും. ഗതാഗത സെക്രട്ടറിയുടെ ഓഫീസ് അറിയിച്ചു.