നേമത്തെ ശക്തൻ കെ.മുരളീധരൻ: ഉമ്മൻ ചാണ്ടി രണ്ടിടത്ത് മത്സരിക്കില്ല; പുതുപ്പള്ളിയിൽ ഉമ്മൻ ചാണ്ടി തന്നെ കൊല്ലത്ത് ബിന്ദുവും കുണ്ടറയിൽ വിഷ്ണുവും സ്ഥാനാർത്ഥിയാകും
സ്വന്തം ലേഖകൻ
ന്യൂഡൽഹി: സംസ്ഥാനത്ത് നിയമസഭാ തിരഞ്ഞെടുപ്പിനുള്ള കോൺഗ്രസിൻ്റെ അന്തിമ സ്ഥാനാർത്ഥി പട്ടിക ഞായറാഴ്ച രാവിലെ പ്രഖ്യാപിച്ചേയ്ക്കും. തര്‍ക്കങ്ങള്‍ക്കും ആശങ്കകള്‍ക്കും നാടകീയതകള്‍ക്കും ശേഷമാണ്, നിയമസഭാ തെരഞ്ഞെടുപ്പിനുള്ള കോണ്‍ഗ്രസ് സ്ഥാനാര്‍ഥി പട്ടികയില്‍ അന്തിമ തീരുമാനമായതെന്നാണ് സൂചന. ദിവസങ്ങളായി നടന്ന സ്ക്രീനിംഗ് കമ്മിറ്റിക്ക് ശേഷം, രാജ്യതലസ്ഥാനത്ത് തങ്ങുന്ന കെപിസിസി അധ്യക്ഷന്‍ മുല്ലപ്പള്ളി രാമചന്ദ്രനുമായി ഹൈക്കമാന്‍ഡ് പ്രതിനിധികള്‍ നടത്തിയ ചര്‍ച്ചയ്ക്കൊടുവിലാണ് സ്ഥാനാര്‍ഥി നിര്‍ണയം അന്തിമമായത്.
സംസ്ഥാനത്തിന്‍റെ ശ്രദ്ധാകേന്ദ്രമായി മാറിയ നേമം മണ്ഡലത്തില്‍ ലോക്സഭാംഗം കൂടിയായ കെ.മുരളീധരനെ മത്സരിപ്പിക്കാന്‍ തീരുമാനമായെന്നാണ് വിവരം.ഉമ്മന്‍ ചാണ്ടി പുതുപ്പള്ളിയില്‍ത്തന്നെ മല്‍സരത്തിനിറങ്ങും. തൃപ്പൂണിത്തുറയില്‍ കെ. ബാബുവും കൊല്ലത്ത് ബിന്ദു കൃഷ്ണയും കുണ്ടറയില്‍ പി.സി. വിഷ്ണുനാഥും മല്‍സരിക്കുമെന്നും വിവരമുണ്ട്. പട്ടാമ്പി, നിലമ്പൂര്‍ ഒഴികെയുള്ള സീറ്റുകളില്‍ പ്രഖ്യാപനം ഇന്ന് നടക്കും.
Whatsapp Group 1 | Whatsapp Group 2 |Telegram Group
അഭിമാനപ്പോരാട്ടത്തിലൂടെ ബിജെപിയില്‍ നിന്ന് നേമം പിടിച്ചെടുക്കാനുള്ള ശ്രമത്തില്‍ മണ്ഡലത്തില്‍ ശക്തനായ സ്ഥാനാര്‍ഥിയെ തന്നെ രംഗത്തിറക്കുമെന്ന് കോണ്‍ഗ്രസ് നേതൃത്വം നേരത്തെ അറിയിച്ചിരുന്നു. തിരുവനന്തപുരത്തെ വട്ടിയൂര്‍ക്കാവ് മണ്ഡലം അടുത്തിടെ മികച്ച പോരാട്ടത്തിലൂടെ കൈക്കലാക്കിയ കെ.മുരളീധരനെ രംഗത്തിറക്കുന്നതിലൂടെ ബിജെപിക്കെതിരെ നേമത്തും ശക്തമായ പോരാട്ടത്തിനാണ് കോണ്‍ഗ്രസ് ഒരുങ്ങുന്നത്.
കോണ്‍ഗ്രസ് ലിസ്റ്റ് ഞായറാഴ്ച പ്രഖ്യാപിക്കാനിരിക്കെ മുതിര്‍ന്ന നേതാക്കള്‍ എല്ലാം തന്നെ പട്ടികയില്‍ നിന്ന് പുറത്തെന്നാണ് സൂചന. സിറ്റിംഗ് എം.എല്‍.എ എന്ന നിലയില്‍ അനില്‍ അക്കരയെയും പദ്മജ വേണുഗോപാലിനെയും പരിഗണിച്ചപ്പോള്‍ മറ്റെല്ലാ മുതിര്‍ന്ന നേതാക്കളും കളത്തിന് പുറത്തായതാണ് വിവരം.
കഴിഞ്ഞ തവണ മത്സരിച്ച ഒ. അബ്ദുള്‍ റഹിമാന്‍ കുട്ടി, ടി. യു രാധാകൃഷ്ണന്‍, സുന്ദരന്‍ കുന്നത്തുള്ളി, എം.പി വിന്‍സെന്റ്, കെ.പി ധനപാലന്‍, പി. എ. മാധവന്‍ എന്നിവരില്‍ ഒരാള്‍ പോലും ലിസ്റ്റില്‍ കയറിക്കൂടിയിട്ടില്ല. അതുപോലെ സീറ്റ് പ്രതീക്ഷിച്ചിരുന്ന എം.പി ജാക്‌സണ്‍, ടി.വി ചന്ദ്രമോഹന്‍, എം.എസ് അനില്‍ കുമാര്‍, രാജന്‍ പല്ലന്‍ എന്നിവരും പുറത്താണെന്നാണ് സൂചന.
തര്‍ക്കമുള്ള 10 മണ്ഡലങ്ങളില്‍ ഒഴികെ ഏകദേശ ധാരണയായ 81 മണ്ഡലങ്ങളില്‍ കോണ്‍ഗ്രസിന് 55 പുതുമുഖ സ്ഥാനാര്‍ഥികള്‍. യുഡിഎഫ് ധാരണ അനുസരിച്ച്‌ കോണ്‍ഗ്രസിന് 91 സീറ്റുകളാണുള്ളത്. ഇരിക്കൂര്‍ ഒഴികെ മറ്റു സിറ്റിംഗ് എംഎല്‍എമാരെല്ലാം അതതു മണ്ഡലങ്ങളില്‍ തന്നെ മത്സരിക്കും. മുന്‍ എംഎല്‍എ എം. മുരളി ചെങ്ങന്നൂരില്‍ മത്സരിക്കും.
81 മണ്ഡലങ്ങളില്‍ സ്ഥാനാര്‍ത്ഥികളെ തീരുമാനിച്ചിട്ടുണ്ടെന്നും നേമം ഉള്‍പ്പെടെ പത്തു മണ്ഡലങ്ങളില്‍ മാത്രമാണ് അന്തിമധാരണയാകാത്തതെന്നുമാണ് കഴിഞ്ഞ ദിവസം നേതാക്കള്‍ അറിയിച്ചത്. എന്നാല്‍ ഇന്നലെയും സ്ഥാനാര്‍ത്ഥി പട്ടിക മാറിമറിഞ്ഞുവെന്നാണ് വിവരം.
പാര്‍ട്ടി ആവശ്യപ്പെട്ടാല്‍ ഏത് വെല്ലുവിളിയും ഏറ്റെടുക്കുമെന്ന് കെ. മുരളീധരന്‍ നേരത്തെ പറഞ്ഞിരുന്നു. മുഖ്യമന്ത്രി സ്ഥാനാര്‍ത്ഥിയാക്കിയാല്‍ മത്സരിക്കുമെന്ന് ഒരിക്കലും പറഞ്ഞിട്ടില്ല. . ഇഴഞ്ഞുകയറിച്ചെന്ന് സീറ്റ് ചോദിക്കുന്ന ആളല്ല താന്‍. നേമത്ത് മത്സരിക്കാന്‍ തയ്യാറാണോ എന്ന് എ.ഐ.സി.സി അംഗങ്ങളോ ഉമ്മന്‍ചാണ്ടിയോ മുല്ലപ്പള്ളിയോ ചെന്നിത്തലയോ തന്നോട് ചോദിച്ചിട്ടില്ല. പിന്നെ എങ്ങനെയാണ് മത്സരിക്കാന്‍ താന്‍ സന്നദ്ധത അറിയിച്ചു എന്ന തരത്തില്‍ വാര്‍ത്ത വന്നതെന്ന് അറിയില്ല. എന്നാല്‍ പാര്‍ട്ടി ആവശ്യപ്പെട്ടാല്‍ നേമത്ത് മത്സരിക്കുമെന്നും മുരളീധരന്‍ വ്യക്തമാക്കിയിരുന്നു.
ഉമ്മന്‍ചാണ്ടി പുതുപ്പള്ളിയില്‍ തന്നെ മത്സരിക്കും. സീറ്റുകളെച്ചൊല്ലി വ്യാപക പരാതിയുയര്‍ന്ന തൃപ്പൂണിത്തുറയിലും കൊല്ലത്തും സ്ഥാനാര്‍ത്ഥി ലിസ്റ്റില്‍ മാറ്റമുണ്ടാകും. തൃപ്പൂണിത്തുറയില്‍ കെ.ബാബുവും കൊല്ലത്ത് ബിന്ദു കൃഷ്ണയും സ്ഥാനാര്‍ത്ഥികളാകും. കൊല്ലത്ത് മത്സരിക്കാനിരുന്ന പി.സി.വിഷ്ണുനാഥ് കുണ്ടറയിലേക്ക് മാറും.
കൊട്ടാരക്കരയില്‍ ആര്‍ രശ്മി, ചടയമംഗലം എം.എം നസീര്‍, പത്തനാപുരം ജ്യോതികുമാര്‍ ചാമക്കാല, ചാത്തന്നൂര്‍ പീതാംബരക്കുറുപ്പ് എന്നിവരും സ്ഥാനാര്‍ത്ഥികളാകും.
