ട്രെയിനില്‍ കയറുന്നതിനിടെ വീണ്‌ നഴ്‌സിന്റെ കാല്‍പാദം അറ്റു.

സ്വന്തം ലേഖകൻ

തലശേരി : ട്രെയിനില്‍ കയറുന്നതിനിടെ വീണ് സ്ത്രീയുടെ കാല്‍പാദം അറ്റു. പയ്യാവൂര്‍ ഉളിക്കല്‍ കരപ്ലാക്കില്‍ ഹൗസില്‍ മിനി ജോസഫിന്റെ (47) ഇടതു കാല്‍പാദമാണ് അറ്റുപോയത്.

തലശേരി സ്റ്റേഷനില്‍ നിന്ന് ട്രെയിന്‍ നീങ്ങുന്നതിനിടെ കമ്ബാര്‍ട്ട്മെന്റ് മാറി കയറുമ്ബോള്‍ ബുധന്‍ രാവിലെ 7.15നാണ് അപകടം.

മുംബൈ–-തിരുവനന്തപുരം നേത്രാവതി എക്സ്പ്രസില്‍ കയറുന്നതിടെയാണ് അപകടമുണ്ടായത്. തീവണ്ടിക്കും പ്ലാറ്റ്ഫോമിനും ഇടയിലാണ് കാല്‍ കുടുങ്ങിയത്. ജോലി ചെയ്യുന്ന തിരൂരിലെ ആശുപത്രിയിലേക്ക് പോവുകയായിരുന്നു. ഭര്‍ത്താവും മകളും ഒപ്പമുണ്ടായിരുന്നു. തലശേരി ജനറല്‍ ആശുപത്രിയില്‍ പ്രഥമ ശുശ്രൂഷ നല്‍കിയശേഷം കോഴിക്കോട് മെഡിക്കല്‍ കോളേജിലേക്ക് വിദഗ്ധ ചികിത്സയ്ക്കായി കൊണ്ടുപോയിരിക്കുകയാണ്.