കടുത്ത സാമ്പത്തിക പ്രതിസന്ധി; കാഞ്ഞിരപ്പള്ളി ജനറല്‍ ആശുപത്രിയില്‍ ഒപി, കാഷ്വാലിറ്റി ടിക്കറ്റ് ചാര്‍ജിൽ വര്‍ധനവ്; ഇന്ന് മുതല്‍ അഞ്ച് രൂപ….

സ്വന്തം ലേഖിക

കാഞ്ഞിരപ്പള്ളി: കാഞ്ഞിരപ്പള്ളി ജനറല്‍ ആശുപത്രിയിലെ ഒപി, കാഷ്വാലിറ്റി ടിക്കറ്റ് ചാര്‍ജുകള്‍ ഇന്നു മുതല്‍ അഞ്ചു രൂപ.

എച്ച്‌എംസി മീറ്റിംഗിലാണ് രണ്ടു രൂപയില്‍ നിന്നു അഞ്ചു രൂപയായി വര്‍ധിപ്പിക്കാന്‍ തീരുമാനിച്ചത്. നിലവില്‍ എച്ച്‌എംസിയുടെ കീഴില്‍ 40 ജീവനക്കാര്‍ ഇവിടെ ജോലി ചെയ്യുന്നുണ്ട്.

ഇവര്‍ക്ക് ശമ്പളം കൊടുക്കുന്നത് ഈ പണം കൊണ്ടാണ്. കൂടാതെ ആശുപത്രിയുടെ ദൈനംദിന പ്രവര്‍ത്തനങ്ങള്‍ക്കുള്ള തുകയും ഇതില്‍ നിന്നാണ് കണ്ടെത്തുന്നത്.

കാത്ത് ലാബിന്‍റെയടക്കം പ്രവര്‍ത്തനങ്ങള്‍ക്ക് ടിക്കറ്റ് വരുമാനത്തെയാണ് ആശ്രയിക്കുന്നത്. കടുത്ത സാമ്പത്തിക പ്രതിസന്ധി നേരിടുന്ന സാഹചര്യത്തിലാണ് വര്‍ധനവ് വരുത്തിയിരിക്കുന്നതെന്ന് അധികൃതര്‍ പറ‍ഞ്ഞു.