ഉമാ തോമസിന്‍റെ വിജയം സുനിശ്ചിതം; കേരളത്തില്‍ സിപിഎം-ബിജെപി അവിശുദ്ധ ബന്ധമെന്ന് ജിഗ്നേഷ് മേവാനി

സ്വന്തം ലേഖകൻ

കൊച്ചി : തൃക്കാക്കരയില്‍ യുഡിഎഫ് സ്ഥാനാർത്ഥി ഉമാ തോമസിന്‍റെ വിജയം സുനിശ്ചിതമാണ്. കേരളത്തില്‍ നടക്കുന്നത് സിപിഎം-ബിജെപി അവിശുദ്ധ ബന്ധമെന്നും ഗുജറാത്തിലെ സ്വതന്ത്ര എംഎല്‍എ ജിഗ്നേഷ് മേവാനി.

സിപിഎമ്മിനെതിരെ രൂക്ഷവിമർശനവുമായി രം​ഗത്തു വന്നിരിക്കുകയാണ് ജിഗ്നേഷ് മേവാനി. കേരള സർക്കാർ ഗുജറാത്ത് മോഡൽ പഠിക്കുന്നത് പരാമർശിച്ചായിരുന്നു വിമർശനം. ബിജെപി മുഖ്യമന്ത്രിമാർ പോലും ഗുജറാത്ത് മാതൃക പഠിക്കാൻ ഇതുവരേയും തയാറായിട്ടില്ല എന്നും ജിഗ്നേഷ് മേവാനി പരിഹസിച്ചു

കേരളത്തില്‍ എല്ലാ വികസനവും നടപ്പാക്കിയത് കോൺഗ്രസാണ്. യുഡിഎഫ് കൊണ്ടുവന്ന വികസനപദ്ധതികളെ എതിർത്തവരാണ് സിപിഎം. സംസ്ഥാനത്തെ ബിജെപി-സിപിഎം അവിശുദ്ധ ബന്ധം ശ്രദ്ധിക്കേണ്ടതാണ്. യുഡിഎഫ് കേന്ദ്ര തെരഞ്ഞെടുപ്പ് കമ്മിറ്റി ഓഫീസില്‍ മാധ്യമങ്ങളെ കാണുകയായിരുന്നു അദ്ദേഹം.

ഗുജറാത്ത് മോഡൽ ഊതി വീർപ്പിച്ചത് മാത്രം. അത് കോർപ്പറേറ്റുകള്‍ക്ക് വേണ്ടിയുള്ളതാണ്, ന്യൂനപക്ഷങ്ങൾക്കും ദളിതർക്കും എതിരാണ്. കൊവിഡ് കാലത്ത് ഗുജറാത്തിന്‍റെ ആരോഗ്യ മേഖലയുടെ അവസ്ഥ രാജ്യം കണ്ടതാണ്.

പട്ടികജാതി വർഗ വിഭാഗങ്ങളെ മുൻ നിരയിലേക്ക് കൊണ്ടുവരാൻ എൽഡിഎഫ് ഒന്നും ചെയ്യുന്നില്ല. വാളയാർ വിഷയത്തിൽ നീതി ലഭിക്കാനുള്ള സമരം നമ്മൾ കണ്ടതാണെന്നും അദ്ദേഹം ചൂണ്ടിക്കാട്ടി.