വ്യാജരേഖ ചമച്ച് തട്ടിപ്പ്; വിവിധ ബാങ്കുകളെ കബളിപ്പിച്ച് ഒരു കോടിയോളം രൂപ തട്ടിയ സിനിമ നിര്മാതാവ് പിടിയില്
സ്വന്തം ലേഖിക
പാലാ: വ്യാജരേഖ ചമച്ച് വിവിധ ബാങ്കുകളെ കബളിപ്പിച്ച് ഒരു കോടിയോളം രൂപയുടെ വായ്പ തട്ടിപ്പ് നടത്തിയ കേസില് സിനിമ നിര്മാതാവിനെ രാമപുരം പൊലീസ് അറസ്റ്റ് ചെയ്തു.
ഏഴാച്ചേരി താമരമുക്ക് കട്ടക്കനടയില് ബിജു ജെ. കട്ടക്കലിനെയാണ് (44) അറസ്റ്റ് ചെയ്തത്. ഏഴാച്ചേരി ബാങ്ക് അധികൃതരുടെ പരാതിയിലാണ് അറസ്റ്റ്.
Whatsapp Group 1 | Whatsapp Group 2 |Telegram Group
2009ല് ഏഴാച്ചേരി സര്വിസ് സഹകരണ ബാങ്കില് നിന്ന് വസ്തു പണയപ്പെടുത്തി ഇയാള് വായ്പ എടുത്തിരുന്നു. കുടിശ്ശികകൂടി ചേര്ത്ത് 24 ലക്ഷത്തോളം രൂപ ബാധ്യതയായി നിലനിലനില്ക്കെ ഇതേ സ്ഥലത്തിന്െറ ആധാരങ്ങളും രേഖകളും വ്യാജമായി ചമച്ച് ജില്ല ബാങ്കിന്െറ കൊല്ലപ്പള്ളി ശാഖയില് നിന്ന് വായ്പ എടുത്തതായി പൊലീസ് പറഞ്ഞു.
വിവിധ ബാങ്കുകളെ കബളിപ്പിച്ച സംഭവത്തില് പാലാ, മേലുകാവ് സ്റ്റേഷനുകളിലും ഇയാള്ക്കെതിരെ കേസുണ്ടെന്നും കസ്റ്റഡിയില് വാങ്ങി വിശദമായി ചോദ്യം ചെയ്യുമെന്നും പൊലീസ് പറഞ്ഞു.
2018ല് പുറത്തിറങ്ങിയ ഒരു മലയാള സിനിമയുടെ നിര്മാതാവായ ഇയാള് ‘സ്ഫടികം’ സിനിമയുടെ രണ്ടാം ഭാഗമായി ‘സ്ഫടികം 2 ഇരുമ്ബന്’ എന്ന സിനിമ നിര്മിക്കുന്നതിനുള്ള തയാറെടുപ്പിലായിരുന്നുവെന്ന് പൊലീസിനോട് വെളിപ്പെടുത്തി.
വാഗമണ്ണിലെ സ്വന്തം റിസോര്ട്ടില് നിന്നാണ് ഇയാളെ കസ്റ്റഡിയിലെടുത്തത്. രാമപുരം സി.ഐ കെ എന് രാജേഷ്, എസ്.ഐ പി എസ് അരുണ്കുമാര് എന്നിവര് ചേര്ന്നാണ് അറസ്റ്റ് ചെയ്തത്.