കോട്ടയം ജില്ലാ പഞ്ചായത്തിലേയ്ക്കുള്ള സിപിഐ സ്ഥാനാർഥികളെ പ്രഖ്യാപിച്ചു: പോരാട്ടത്തിനൊരുങ്ങി സി.പി.ഐ

സ്വന്തം ലേഖകൻ

കോട്ടയം: കോട്ടയം ജില്ലാ പഞ്ചായത്തിലേയ്ക്കുള്ള സിപിഐ സ്ഥാനാർഥികളെ ജില്ലാ സെക്രട്ടറി സികെ ശശിധരൻ പ്രഖ്യാപിച്ചു. ശുഭേഷ് സുധാകരൻ (എരുമേലി), പിഎസ് പുഷ്പമണി (വൈക്കം),ഹേമലതാ പ്രേംസാഗർ(കങ്ങഴ), ലൈസാമ്മ ജോർജ്ജ്(വാകത്താനം) എന്നിവരാണ് സ്ഥാനാർഥികൾ.

എരുമേലി – ശുഭേഷ് സുധാകരൻ (സിപിഐ)

സിപിഐ സംസ്ഥാന കൗൺസിലിലെ ഏറ്റവും പ്രായം കുറഞ്ഞ അംഗമാണ് ശുഭേഷ് സുധാകരൻ . എഐഎസ്എഫ് മുൻ സംസ്ഥാന സെക്രട്ടറിയും, നിലവിൽ ദേശിയ വൈസ് പ്രസിഡന്റുമാണ്. കൂട്ടിക്കൽ സ്വദേശി. സിപിഐ സംസ്ഥാന സെക്രട്ടറി കാനം രാജേന്ദ്രന്റെ രാഷ്ട്രീയ കാര്യ സെക്രട്ടറിയായിരുന്നു. ചങ്ങനാശ്ശേരി എൻഎസ്എസ് കോളേജിലെ പഠനത്തിനിടെ എഐഎസ്എഫിലെത്തിയ ശുഭേഷ്, ജില്ലാ സെക്രട്ടറിയായി ദീർഘനാൾ പ്രവർത്തിച്ചു . സ്വാശ്രയ വിദ്യാഭ്യാസ നയങ്ങൾക്കെതിരെയുള്ള സമരങ്ങളിൽ ക്രൂരമായ പൊലീസ് മർദ്ദനത്തിനിരയായി. കാഞ്ഞിരപ്പള്ളി ബ്ലോക്ക് പഞ്ചായത്ത് കൂട്ടിക്കൽ ഡിവിഷൻ അംഗമായി ജനസമ്മതി നേടി.

കങ്ങഴ – ഹേമലത പ്രേം സാഗർ (സിപിഐ)

എം എ മലയാളം ബിരുദാനന്തര ബിരുദദാരിയായ ഹേമലത സിപിഐ ജില്ലാ കൗൺസിൽ അംഗവും, കേരള മഹിളാസംഘം ജില്ലാ പ്രസിഡന്റും സംസ്ഥാന കമ്മിറ്റിയംഗവുമാണ്. മാമ്മുട് സെന്റ് സാന്താൾസ് ഹൈസ്‌കൂളിലും, ചങ്ങനാശേരി എൻ എസ് എസ് കോളേജിലുമായിരുന്നു പഠനം. വെള്ളാവൂർ പഞ്ചായത്തംഗം, വാഴൂർ ബ്ലോക്ക് പഞ്ചായത്തംഗം, വെള്ളാവൂർ സർവ്വീസ് സഹകരണ ബാങ്ക് ഭരണസമിതിയംഗം എന്നീ നിലകളിൽ പ്രവർത്തിച്ചിരുന്നു.

വൈക്കം – പിഎസ് പുഷ്പമണി (സിപിഐ)

സിപിഐ ജില്ലാ കൗൺസിൽ അംഗം, കേരള മഹിളാസംഘം
തലയോലപ്പറമ്പ് മണ്ഡലം സെക്രട്ടറി എന്നീ നിലകളിൽ പ്രവർത്തിക്കുന്ന പി എസ് പുഷ്പമണി ബ്രഹ്മമംഗലം സ്വദേശിയാണ്. ജില്ലാ പഞ്ചായത്ത് അംഗമായി മികച്ച പ്രവർത്തനം കാഴ്ചവച്ച പുഷ്പമണി , ചെമ്പ് പഞ്ചായത്ത് വൈസ് പ്രസിഡന്റായും സേവനമനുഷ്ടിച്ചിട്ടുണ്ട്. അങ്കണവാടി വർക്കേഴ്സ് ആൻഡ് ഹെൽപ്പേഴ്സ് യൂണിയൻ മണ്ഡലം സെക്രട്ടറി, സംസ്ഥാനകമ്മിറ്റിയംഗം, വർക്കിങ് വിമൻസ് ഫോറം ജില്ലാപ്രസിഡൻറ് എന്നീ ചുമതലകളും നിർവഹിക്കുന്നു.

വാകത്താനം – ലൈസാമ്മ ജോർജ്ജ് (സിപിഐ)

പൊതുരംഗത്ത് പത്തരമാറ്റ് തെളിയിച്ച സ്ഥാനാർഥിയാണ് ലൈസാമ്മ ജോർജ്ജ്. എട്ടുവർഷം വാകത്താനം ഗ്രാമപഞ്ചായത്ത് പ്രസിഡന്റായിരുന്നു. 2000 മുതൽ 2005 വരെയും 2010 മുതൽ 2013 വരെയായിരുന്നു പഞ്ചായത്തിന്റെ സാരഥ്യം. 2005 മുതൽ 2010 വരെ മാടപ്പള്ളി ബ്ലോക്കുപഞ്ചായത്ത് വൈസ് പ്രസിഡന്റായിരുന്നു. 2015 മുതൽ ബ്ലോക്കു പഞ്ചായത്ത് അംഗമാണ്. പ്രസിഡന്റ് ചുമതലയിലെത്തിയ 2017 മുതൽ വികസനക്കുതിപ്പിന്റെ കഥ ഏറെയുണ്ട് മാടപ്പള്ളി ബ്ലോക്ക് പഞ്ചായത്തിന്. പൊതുരംഗത്തെ മികവിനും ഭരണനൈപുണ്യത്തിനും അംഗീകരമാകുകയാണ് ജില്ലാ പഞ്ചായത്ത് സ്ഥാനാർഥിത്വം.