പള്ളനാട്ടിനെ വിറപ്പിച്ച് ഒറ്റയാൻ

സ്വന്തംലേഖകൻ
മറയൂർ: മറയൂർ പഞ്ചായത്തിലെ ജനവാസ മേഖലയായ പള്ളനാട്ടിനെ ഭീതിയിലാഴ്ത്തി ഒറ്റയാന്റെ വരവ്. വെള്ളിയാഴ്ച രാത്രിയോടുകൂടിയെത്തിയ ഒറ്റയാൻ നിരവധി തെങ്ങുകളും കമുകുകളും നശിപ്പിച്ചു. അൻപതുവർഷത്തിനുശേഷമാണ് പള്ളനാട്ടിൽ ഒറ്റയാൻ എത്തുന്നത് . കഴിഞ്ഞദിവസം ചട്ട മൂന്നാർ ചെക്ക് പോസ്റ്റിന് സമീപമെത്തിയ ഒറ്റയാനാണ് പള്ള നാട്ടിലെത്തിയിരിക്കുന്നത്. മൂന്നാർ മറയൂർ സംസ്ഥാന പാതയിലൂടെയാണ് ആന ചെക്ക്പോസ്റ്റ് മേഖലയിൽ പ്രവേശിച്ചത് . പള്ളനാട് സ്വദേശി അമീർ ചെല്ല ദുരൈയുടെ കൃഷിയിടത്തിലാണ് കൂടുതലായി നാശം വിതച്ചത്. മൂന്നാർ, മറയൂർ റേഞ്ചുകളിലെ ഉദ്യോഗസ്ഥരും നാട്ടുകാരും ചേർന്ന് രാത്രി മുതൽ ആനയെ വിരട്ടിയെങ്കിലും ശനിയാഴ്ച രാവിലെ 11 മണിയോടുകൂടിയാണ് പാമ്പൻ മല ഭാഗത്തേക്ക് എത്തിക്കുവാൻ കഴിഞ്ഞത്.