![ഡല്ഹി കേരള ഹൗസിലെ ഡിവൈഎഫ്ഐ യോഗം; ചട്ടം മറികടന്നെന്ന് ആരോപണം: പ്രതിഷേധവുമായി യൂത്ത് കോണ്ഗ്രസ് ഡല്ഹി കേരള ഹൗസിലെ ഡിവൈഎഫ്ഐ യോഗം; ചട്ടം മറികടന്നെന്ന് ആരോപണം: പ്രതിഷേധവുമായി യൂത്ത് കോണ്ഗ്രസ്](https://i0.wp.com/thirdeyenewslive.com/storage/2021/10/13fbfce8d70bcc898a4feaa852b7d4f90189e50d286e18bd512352991c3320e8.jpg?fit=806%2C433&ssl=1)
ഡല്ഹി കേരള ഹൗസിലെ ഡിവൈഎഫ്ഐ യോഗം; ചട്ടം മറികടന്നെന്ന് ആരോപണം: പ്രതിഷേധവുമായി യൂത്ത് കോണ്ഗ്രസ്
സ്വന്തം ലേഖിക
ന്യൂഡല്ഹി: ഡല്ഹിയിലെ കേരള ഹൗസില് ഡിവൈഎഫ്ഐ കേന്ദ്ര കമ്മിറ്റി യോഗം ചേര്ന്നത് വിവാദത്തിൽ. യോഗത്തിനെതിരെ പ്രതിഷേധവുമായി യൂത്ത് കോണ്ഗ്രസ് രംഗത്ത്.
ചട്ടം മറികടന്ന് ഡിവൈഎഫ്ഐക്കായി കോണ്ഫറന്സ് മുറി അനുവദിച്ചെന്ന് യൂത്ത് കോണ്ഗ്രസ് ആരോപിച്ചു. കേരള ഹൗസിലെ കോണ്ഫറന്സ് ഹാളിലാണ് ഇന്ന് ഡിവൈഎഫ്ഐ കേന്ദ്ര കമ്മിറ്റി യോഗം ചേര്ന്നിരുന്നത്. ഡിവൈഎഫ്ഐ അഖിലേന്ത്യാ അധ്യക്ഷനായിരുന്ന മന്ത്രി പി എ മുഹമ്മദ് റിയാസും യോഗത്തില് പങ്കെടുത്തിരുന്നു.
Whatsapp Group 1 | Whatsapp Group 2 |Telegram Group
കേരള ഹൗസ് റസിഡന്റ് കമ്മീഷണര്ക്ക് പരാതി നല്കുമെന്ന് യൂത്ത് കോണ്ഗ്രസ് ഡല്ഹി വക്താവ് വിനീത് തോമസ് പറഞ്ഞു. നിലവിലെ ഡിവെഎഫ്ഐ ദേശീയ അധ്യക്ഷന് പി എ മുഹമ്മദ് റിയാസ് പൊതുമരാമത്ത് വകുപ്പ് മന്ത്രിയായി ചുമതലയേറ്റ സാഹചര്യത്തിലാണ് സംഘടനാ ചുമതല ഒഴിഞ്ഞത്.
നിലവിലെ സംസ്ഥാന സെക്രട്ടറി എ എ റഹീമാണ് ഡിവൈഎഫ്ഐ അഖിലേന്ത്യാ സെക്രട്ടറിയായി ചുമതലയേറ്റത്. അടുത്ത അഖിലേന്ത്യാ സമ്മേളനം വരെയാണ് റഹീമിന് ചുമതല. താത്കാലിക ചുമതലയാണ് ഇപ്പോള് റഹീമിന് നല്കുന്നതെങ്കിലും ഡിവൈഎഫ്ഐയുടെ അടുത്ത സമ്മേളനത്തില് റഹീം നേരിട്ട് അധ്യക്ഷനാവാണ് സാധ്യത.
ഇന്നലെ ഡല്ഹിയില് ചേര്ന്ന ഫ്രാക്ഷന് യോഗത്തില് റഹീമിന് ചുമതല നല്കുന്നത് സംബന്ധിച്ച് ധാരണയുായിരുന്നു. റഹീം ദേശീയ നേതൃത്വത്തിലേക്ക് മാറുന്നതോടെ സംസ്ഥാന ഡിവെഎഫ്ഐ നേതൃത്വത്തിലും മാറ്റമുണ്ടാവും.
കേരളത്തില് നിന്നുള്ള മറ്റൊരു നേതാവായ ജെയ്ക്ക് പി തോമസിനെ ഡിവൈഎഫ്ഐ കേന്ദ്ര കമ്മിറ്റിയില് ഉള്പ്പെടുത്തിയിട്ടുണ്ട്. എം.വിജിന്, കെ വി സുമേഷ്, സച്ചിന് ദേവ്, കെ റഫീഖ് എന്നിവരുടെ പേരുകള് ഡിവൈഎഫ്ഐ സംസ്ഥാന സെക്രട്ടറി സ്ഥാനത്തേക്ക് പരിഗണനയിലുണ്ടെന്നാണ് ലഭിക്കുന്ന സൂചന. ഇക്കാര്യത്തില് വൈകാതെ തീരുമാനുണ്ടാവുമെന്നാണ് അറിയുന്നത്.