രാജ്യത്തെ 70 ലക്ഷം ക്രഡിറ്റ് കാർഡ് – ഡെബിറ്റ് കാർഡ് ഉമടകളുടെ രഹസ്യവിവരങ്ങൾ ചോർന്നു: അക്കൗണ്ട് വിവരങ്ങളും രേഖകളും അടക്കം ചോർത്തിയത് വിദേശ കമ്പനിയെന്നു സൂചന; പുറത്തായത് ഞെട്ടിക്കുന്ന വിവരങ്ങൾ

തേർഡ് ഐ ബ്യൂറോ

കോട്ടയം: രാജ്യത്തെ 70 ലക്ഷം ഡെബിറ്റ് ക്രഡിറ്റ് കാർഡ് ഉപഭോക്താക്കളുടെ രഹസ്യ വിവരങ്ങളും അക്കൗണ്ട് നമ്പരും അടക്കം സോഷ്യൽ മീഡിയ തട്ടിപ്പ് മാഫിയ സംഘത്തിന്റെ കൈവശം എത്തിയതായാണ് വിവരം ലഭിച്ചിരിക്കുന്നത്. ഈ വിവരങ്ങൾ ഉപയോഗിച്ച് ബാങ്കിങ് തട്ടിപ്പ് അടക്കം നടക്കുന്നതായാണ് വിവരം ലഭിച്ചിരിക്കുന്നത്.

ഈ വിവരങ്ങൾ ഡാർക്ക് വെബിൽ ലഭ്യമാണെന്ന് സ്വതന്ത്ര ഇന്ത്യൻ സൈബർ സുരക്ഷാ ഗവേഷകനായ രാജ്‌ശേഖർ രാജഹാരിയയെ ഉദ്ധരിച്ച് ന്യൂസ് 18 റിപോർട്ട് ചെയ്തു. ഉപയോക്താക്കളുടെ പേരുകൾ, ഫോൺ നമ്പറുകൾ, ഇ-മെയിൽ വിലാസങ്ങൾ, ജോലി ചെയ്യുന്ന സ്ഥാപനങ്ങൾ, വാർഷിക വരുമാനം, ജനനത്തീയതി എന്നിവ ചോർന്ന വിവരങ്ങളിൽ ഉൾപ്പെടുന്നുവെന്നാണ് വിവരം. എന്നാൽ മുഴുവൻ ക്രെഡിറ്റ് കാർഡ് നമ്പറുകളും ചോർന്നിട്ടില്ലെന്നാണ് റിപോർട്ടുകൾ.

ചോർന്ന വിവരങ്ങളുടെ ശേഖരം 58 സ്പ്രെഡ് ഷീറ്റുകളിലായി 1.3 ജിബിയോളം വരുമെന്നാണ് വിവരം. ബാങ്കിന്റേയോ, നഗരത്തിന്റേയോ ക്രമത്തിലാണ് ഇവ ക്രമീകരിച്ചിരിക്കുന്നത്. ഇങ്ങനെയുള്ള ഓരോ ക്രമീകരണത്തിലും നൂറ് കണക്കിന് ആളുകളുടെ വിവരങ്ങളുണ്ടെന്നാണ് റിപോർട്ട്.

സാമ്പത്തിക ഇടപാടുകൾ നടത്താൻ ഈ ഡാറ്റ നേരിട്ട് ഉപയോഗിക്കാൻ കഴിയില്ലെന്നാണ് വിലയിരുത്തൽ. എന്നാൽ ഈ വിവരങ്ങൾ ഓൺലൈൻ ആൾമാറാട്ടം, ഫിഷിങ് ആക്രമണങ്ങൾ, സ്പാമിങ് എന്നിങ്ങനെയുള്ള സൈബർ കുറ്റകൃത്യങ്ങൾക്കായി ഉപയോഗിച്ചേക്കാം.