കോട്ടയം കറുകച്ചാലിൽ ലോറിയിടിച്ച് സ്കൂട്ടർ യാത്രക്കാരൻ മരിച്ചു: മരിച്ചത് മീനടം സ്വദേശി

സ്വന്തം ലേഖകൻ

കോട്ടയം: കറുകച്ചാലിന് സമീപം ലോറിയിടിച്ച് സ്കൂട്ടർ യാത്രികൻ മരിച്ചു. ചൊവ്വാഴ് ഉച്ചയ്ക്കുണ്ടായ അപകടത്തിൽ ഗുരുതരമായി പരിക്കേറ്റ് കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരുന്ന മീനടം കിളിരൂർ പറമ്പിൽ ജോൺ ജേക്കബ് (ജെയിംസ് ) ആണ് മരിച്ചത്.

പാമ്പാടി കറുകച്ചാൽ റൂട്ടിൽ മാന്തുരുത്തി ജംഗ്ഷനിലായിരുന്നു അപകടം. ജോൺ സഞ്ചരിച്ച സ്കൂട്ടറിൽ ലോറി ഇടിക്കുകയായിരുന്നു. വൈകിട്ട് 6.30 ഓടെ കോട്ടയം മെഡിക്കൽ കോളജ് ആശുപത്രിയിൽ വച്ചാണ് മരണം  സംഭവിച്ചത്.

മീനടത്ത് ബേക്കറി നടത്തുകയായിരുന്നു മരിച്ച ജോൺ. പാമ്പാടി ഭാഗത്തു നിന്നും  വന്ന സ്ക്കൂട്ടറും, കങ്ങഴ റോഡിൽ നിന്നെത്തിയ ലോറിയുമാണ് കൂട്ടിയിടിച്ചത്. കറുകച്ചാൽ റോഡുമായി സംഗമിക്കുന്ന മാന്തുരുത്തി ജംഗ്ഷൻ സ്ഥിരം അപകട മേഖലയാണ്.