രാത്രികാല പട്രോളിങ്ങിനിടെ വിഷ പാമ്പിന് കാവലിരുന്ന് ജനവാസ കേന്ദ്രത്തെ അപകടത്തിൽ നിന്ന് രക്ഷിച്ച് പോലീസ്
സ്വന്തം ലേഖകൻ
തിരുവനന്തപുരം : രാത്രി കാല പട്രോളിങ്ങിനിറങ്ങിയ മെഡിക്കല്‍ കോളേജ് പൊലീസ് സംഘം കണ്ടത് ഇരുളിന്റെ മറവില്‍ ഞെട്ടിക്കുന്ന ഒരു കാഴ്ച.
മെഡിക്കല്‍ കോളേജിന് തൊട്ടടുത്ത ചാലക്കുഴി റോഡിലെ ലൈനിലൂടെ പട്രോളിംഗ് നടത്തുന്നതിനിടെ പൊലീസ് സംഘം കണ്ടത് ഒരു വീട്ടിനകത്തേക്ക് കയറുന്ന കൂറ്റന്‍ മൂര്‍ഖന്‍ പാമ്പിനെ. ഏകദേശം പത്ത് വയസ് പ്രായം വരുന്ന പെണ്‍മൂര്‍ഖന്‍ പാമ്പാണ് വീട്ടിലേക്കു കടക്കാന്‍ ശ്രമിച്ചത്.
Whatsapp Group 1 | Whatsapp Group 2 |Telegram Group
വാഹനം നിര്‍ത്തി പുറത്തിറങ്ങിയ പൊലീസ് എങ്ങനെ ഈ പാമ്പിനെ തടഞ്ഞു നിര്‍ത്തുമെന്നറിയാതെ കുഴങ്ങി പിന്നെ കേരള പൊലീസ് തങ്ങളുടെ ബുദ്ധിപാടവം പുറത്തെടുത്തു. ജീപ്പിന്റെ ലൈറ്റ് പ്രകാശിപ്പിച്ചു പാമ്പിനെ തടഞ്ഞു നിര്‍ത്തി. പിന്നെ ഉരഗ വിദഗ്ദ്ധന്‍ വാവ സുരേഷിനെ അടിയന്തരമായി സ്ഥലത്തെത്താന്‍ വിവരമറിയിച്ചു രണ്ട് മണിക്കൂറോളം കാത്തിരുന്നു.
എസ് ഐ സുനില്‍കുമാര്‍ , സിപിഒമാരായ രജ്ഞിത്ത് , ശ്രീനിവാസന്‍ എന്നിവരായിരുന്നു പട്രോളിംഗ് ടീമില്‍.
ജനവാസകേന്ദ്രമായതിനാല്‍ ഒരു കാരണവശാലും പാമ്പിനെ ഒരിടത്തേക്കും വിടില്ലെന്ന നിശ്ചയദാര്‍ഢ്യത്തോടെ മെഡിക്കല്‍ കോളേജ് പൊലീസ് പാമ്പിനു കാവലിരുന്നു.
ഒടുവില്‍ വാവ സുരേഷ് എത്തി പാമ്പിനെ അനായാസേന പിടികൂടിയതോടെയാണ് പൊലീസ് ലീസ് സംഘത്തിനും നാട്ടുകാര്‍ക്കും ശ്വാസം നേരെ വീണത്.
തടഞ്ഞില്ലെങ്കില്‍ പാമ്പ് ആ വീട്ടിനുള്ളില്‍ കയറിയേനെ. ഓടിച്ചു വിട്ടാല്‍ മറ്റേതെങ്കിലും വീടുകളില്‍ കയറി താമസക്കാര്‍ക്ക് അപകടമുണ്ടാക്കുമായിരുന്നു എന്ന് തിരിച്ചറിഞ്ഞു അതിനു കാവലിരുന്ന മെഡിക്കല്‍ കോളേജ് പൊലീസിനിപ്പോള്‍ അഭിനന്ദന പ്രവാഹമാണ്.
