തണ്ണീര്‍ക്കൊമ്പന് പിന്നാലെ വയനാട്ടില്‍ വീണ്ടും റേഡിയോ കോളര്‍ ഘടിപ്പിച്ച കാട്ടാനയെത്തി; ജനവാസ മേഖലയില്‍ ഇറങ്ങി ഭീതി പരത്തുന്നു; ആക്രമണത്തില്‍ ഒരാള്‍ കൊല്ലപ്പെട്ടു

വയനാട്: വയനാട്ടില്‍ ജനവാസ മേഖലയില്‍ വീണ്ടും കാട്ടാനയുടെ ആക്രമണം.

കാട്ടാനയുടെ ആക്രമണത്തില്‍ ഒരാള്‍ കൊല്ലപ്പെട്ടു.
പടമല സ്വദേശി അജിയാണ് കൊല്ലപ്പെട്ടത്.

വീട്ടുമുറ്റത്ത് നിന്നയാളെ മതില്‍ പൊളിച്ച്‌ കയറിയാണ് ആന ആക്രമിച്ചത്. കർണാടക റേഡിയോ കോളർ ഘടിപ്പിച്ച്‌ വിട്ട മോഴയാനയാണ് ആക്രമിച്ചത്.

ബന്ദിപ്പൂരിലേക്ക് കൊണ്ടുപോകുന്നനിതിനിടെ ചരിഞ്ഞ തണ്ണീർകൊമ്പന് പിന്നാലെയാണ് രണ്ടാമത്തെ റേഡിയോ കോളർ ഘടിപ്പിച്ച ആന കാടിറങ്ങിയത്. വയനാട് പടമല ഭാഗത്താണ് ആനയിറങ്ങിയത്.

ആനയുടെ ആക്രമണത്തിന്‍റെ പശ്ചാത്തലത്തില്‍ മാനന്തവാടി നഗരസഭയിലെ 4 വാർഡുകളില്‍ 144 പ്രഖ്യാപിച്ചു.