വിമാനത്തിലെ പ്രതിഷേധം; കെ.എസ് ശബരീനാഥൻ്റെ ചോദ്യം ചെയ്യൽ ഇന്ന്

വിമാനത്തിൽ മുഖ്യമന്ത്രിക്കെതിരായ പ്രതിഷേധവുമായി ബന്ധപ്പെട്ട് യൂത്ത് കോൺഗ്രസ് വൈസ് പ്രസിഡന്‍റ് കെ.എസ് ശബരീനാഥനെ ഇന്ന് ചോദ്യം ചെയ്യും. രാവിലെ 10ന് ശംഖുംമുഖം അസി. കമ്മീഷണറുടെ ഓഫീസിലാണ് ചോദ്യം ചെയ്യൽ. യൂത്ത് കോൺഗ്രസ് വാട്സ്ആപ്പ് ഗ്രൂപ്പിൽ ശബരീനാഥൻ വിമാനത്തിൽ പ്രതിഷേധിക്കാനുള്ള ആഹ്വാനം പങ്കുവെച്ചെന്നാണ് ആരോപണം.

ശബരീനാഥൻ വിമാനത്തിൽ വച്ച് പ്രതിഷേധത്തിന് നിർദ്ദേശം നൽകിയതായി വിവരം ലഭിച്ചതായി പൊലീസ് പറഞ്ഞു. ഇതുമായി ബന്ധപ്പെട്ട വാട്സാപ്പ് സന്ദേശം പുറത്തുവന്നതിനെ തുടർന്നാണ് നോട്ടീസ് നൽകിയത്. കണ്ണൂരിൽ നിന്ന് തിരുവനന്തപുരത്തേക്കുള്ള വിമാനയാത്രയ്ക്കിടെയാണ് യൂത്ത് കോൺഗ്രസ് മുഖ്യമന്ത്രിക്കെതിരെ പ്രതിഷേധിച്ചത്. യൂത്ത് കോൺഗ്രസ് സംസ്ഥാന നേതൃത്വം സംഘടിപ്പിച്ച യുവചിന്തൻ ക്യാമ്പിൽ വനിതാ നേതാവിന്‍റെ പരാതി പുറത്തുവന്നതിന് പിന്നാലെ ശബരീനാഥിന്‍റെ പേരിലുള്ള വാട്സ്ആപ്പ് ചാറ്റിന്‍റെ സ്ക്രീൻഷോട്ടും പ്രചരിച്ചിരുന്നു.