പ്രോസ്റ്റേറ്റ് കാൻസർ ബാധിച്ചുള്ള മരണങ്ങള്‍ എണ്‍പത്തിയഞ്ചുശതമാനമായി വർധിക്കുന്നു ; പ്രായംകൂടിയവരുടെ എണ്ണം വർധിക്കുംതോറും പ്രോസ്റ്റേറ്റ് കാൻസർ രോഗികളുടെ എണ്ണവും കൂടുന്നു ; 2040 ആകുമ്പോഴേക്കും പ്രോസ്റ്റേറ്റ് കാൻസർ രോഗികള്‍ ഇരട്ടിയാകുമെന്ന് പഠനം
സ്വന്തം ലേഖകൻ
ആഗോളതലത്തില്‍ പ്രോസ്റ്റേറ്റ് കാൻസർ രോഗികള്‍ വർധിക്കുന്നുവെന്ന് ലാൻസെറ്റ് പഠനം. 2040 ആകുമ്ബോഴേക്കും പ്രോസ്റ്റേറ്റ് കാൻസർ രോഗികള്‍ ഇരട്ടിയാകുമെന്നും പഠനത്തില്‍ പറയുന്നു.
പ്രോസ്റ്റേറ്റ് കാൻസർ ബാധിച്ചുള്ള മരണങ്ങള്‍ എണ്‍പത്തിയഞ്ചുശതമാനമായി വർധിക്കുമെന്നും പഠനത്തിലുണ്ട്. ചിലയിനം പ്രോസ്റ്റേറ്റ് കാൻസറുകള്‍ വളരെ പതിയെയാണ് പടരുകയെങ്കില്‍ മറ്റുചിലത് വളരെ വേഗത്തില്‍ ശരീരമാകെ വ്യാപിക്കും. പ്രായം അമ്ബതോ അതില്‍ കൂടുതലോ ആകുന്നത്, കുടുംബത്തിലെ രോഗചരിത്രം തുടങ്ങിയവ രോഗസാധ്യത വർധിപ്പിക്കുന്ന ഘടകങ്ങളാണ്.
Whatsapp Group 1 | Whatsapp Group 2 |Telegram Group
യൂറോപ്യൻ അസോസിയേഷൻ ഓഫ് യൂറോളജിയുടെ പാരീസില്‍ വച്ചുനടക്കുന്ന വാർഷിക കോണ്‍ഗ്രസില്‍ പഠനം അവതരിപ്പിക്കും. ഇന്ത്യയിലെ മൂന്നുശതമാനം കാൻസറുകള്‍ പ്രോസ്റ്റേറ്റ് കാൻസർ ആണെന്ന് പഠനത്തില്‍ പറയുന്നു. ഓരോ വർഷവും 33,000 മുതല്‍ 42,000 വരെ പുതിയ രോഗികള്‍ റിപ്പോർട്ട് ചെയ്യുന്നുണ്ട്.
കഴിഞ്ഞ ഇരുപത്തിയഞ്ചു വർഷത്തിനിടെ ദേശീയതലത്തില്‍ പ്രോസ്റ്റേറ്റ് കാൻസർ രോഗികളുടെ എണ്ണത്തില്‍ മുപ്പതുശതമാനം വർധനവുണ്ടായി. പ്രോസ്റ്റേറ്റ് കാൻസർ സംബന്ധിച്ച അവബോധം കുറവും പരിശോധനകളുടെ പരിമിതിയും മൂലം മിക്ക രോഗികളും രോഗം വ്യാപിച്ചുകഴിയുമ്ബോള്‍ മാത്രം സ്ഥിരീകരിക്കപ്പെടുന്നവരാണ്.
പ്രായംകൂടിയവരുടെ എണ്ണം വർധിക്കുംതോറും പ്രോസ്റ്റേറ്റ് കാൻസർ രോഗികളുടെ എണ്ണവും കൂടുമെന്ന് പഠനത്തില്‍ പറയുന്നു. അതിനാല്‍ തന്നെ രോഗപ്രതിരോധത്തിന് നടപടികള്‍ കൈക്കൊള്ളേണ്ടത് പ്രധാനമാണെന്നും കരുതല്‍ വേണമെന്നും ഗവേഷകർ പറയുന്നു.
പ്രോസ്റ്റേറ്റ് കാൻസർ
പുരുഷന്റെ പ്രത്യുത്പാദന വ്യൂഹത്തിലെ പ്രധാന അവയവമാണ് പ്രോസ്റ്റേറ്റ് ഗ്രന്ഥി. മൂത്രസഞ്ചിയുടെ താഴെ, മലാശയത്തിനു മുന്നിലാണിത് സ്ഥിതിചെയ്യുന്നത്. സെമിനല്‍ ദ്രാവകം ഉത്പാദിപ്പിക്കുകയും പുരുഷ ബീജത്തിന്റെ ശരിയായ പ്രവർത്തനത്തിന് സഹായിക്കുകയും ചെയ്യുക എന്നതാണ് പ്രോസ്റ്റേറ്റ് ഗ്രന്ഥിയുടെ പ്രധാന ധർമം. മൂത്രനാളി ഈ ഗ്രന്ഥിയുടെ മധ്യഭാഗത്തുകൂടിയാണ് കടന്നു പോകുന്നത്.
പുരുഷന്മാരില്‍ കാൻസർ വരാൻ ഏറ്റവും കൂടുതല്‍ സാധ്യതയുള്ള ഒരവയവവുമാണ് പ്രോസ്റ്റേറ്റ് ഗ്രന്ഥി. വികസിതരാജ്യങ്ങളില്‍, പ്രായമായ പുരുഷൻമാരില്‍ സാധാരണയായി കാണുന്ന കാൻസറാണിത്. ഇന്ത്യയില്‍ ആണുങ്ങളിലെ ആദ്യത്തെ പ്രധാന നാല് കാൻസറുകളില്‍ ഒന്ന്. പുരുഷന്മാരില്‍ ഏകദേശം ഏഴില്‍ ഒന്ന് എന്ന തോതില്‍ പ്രോസ്റ്റേറ്റ് കാൻസർ വരാൻ സാധ്യതയുണ്ട്.
ഭൂരിഭാഗം പ്രോസ്റ്റേറ്റ് കാൻസറും 65 വയസ്സ് പിന്നിട്ടവരിലാണ് കാണുന്നത്. പ്രായം കൂടുന്നതിനനുസരിച്ച്‌ പ്രോസ്റ്റേറ്റ് കാൻസർ സാധ്യതയും കൂടുന്നു. 80 വയസ്സിനു മുകളിലുള്ളവരില്‍ മന്ദഗതിയിലുള്ളതും അപകടകരമല്ലാത്തതുമായ, ലക്ഷണങ്ങള്‍ ഇല്ലാത്ത പ്രോസ്റ്റേറ്റ് കാൻസർ നിരക്ക് വളരെ കൂടുതലാണെന്ന് ചില പഠനങ്ങള്‍ പറയുന്നു. 40 വയസ്സിനു താഴെ ഈ കാൻസർ അപൂർവമാണ്. പ്രോസ്റ്റേറ്റ് ഗ്രന്ഥിയെ ബാധിക്കുന്ന കാൻസർ അല്ലാത്ത സാധാരണ വീക്കം ബി.പി.എച്ച്‌. 50 കഴിഞ്ഞ പുരുഷൻമാരില്‍ സാധാരണമാണ്. ഇത് തികച്ചും വ്യത്യസ്ത സ്വഭാവമുള്ള അസുഖമാണ്.
കാരണങ്ങള്‍
പ്രോസ്റ്റേറ്റ് കാൻസറിന്റെ കാരണം വ്യക്തമല്ല. പുരുഷ ഹോർമോണ്‍ പ്രോസ്റ്റേറ്റ് ഗ്രന്ഥിയെയും അതിലെ കാൻസർ കോശങ്ങളെയും ഉദ്ദീപിപ്പിക്കുന്നു. പ്രായം കൂടുന്നതാണ് ഏറ്റവും വലിയ അപകട ഘടകമായി കരുതുന്നത്. അമിതമായ മാംസാഹാരം-പ്രത്യേകിച്ച്‌ ചുവന്ന മാംസം കൊഴുപ്പുകൂടിയ ഭക്ഷണങ്ങള്‍, പഴങ്ങളുടെയും പച്ചക്കറിയുടെയും വിരളമായ ഉപയോഗം എന്നിവ പ്രോസ്റ്റേറ്റ് കാൻസറിനുള്ള സാധ്യത കൂട്ടും. പത്ത് ശതമാനത്തില്‍ താഴെ ആളുകളില്‍ ചില പാരമ്ബര്യ ഘടകങ്ങള്‍ (ഉദാ: ബി.ആർ.സി.എ. ജീൻ) കാണുന്നു. അച്ഛനോ സഹോദരനോ അടുത്ത ബന്ധുക്കള്‍ക്കോ പ്രോസ്റ്റേറ്റ് കാൻസർ വിന്നിട്ടുണ്ടെങ്കില്‍ സാധ്യത കൂടുതലുള്ളതായി കണക്കാക്കും.
ലക്ഷണങ്ങള്‍
മന്ദഗതിയിലുള്ളതും അത്ര മാരകവുമല്ലാത്ത ചിലയിനം പ്രോസ്റ്റേറ്റ് കാൻസർ ചിലപ്പോള്‍ വർഷങ്ങളോളം പ്രത്യേകിച്ച്‌ ലക്ഷണങ്ങള്‍ ഒന്നും കാണിക്കാതെ നിലനില്‍ക്കാം. ഭൂരിഭാഗം പ്രോസ്റ്റേറ്റ് കാൻസറും ഗ്രന്ഥിയുടെ ബാഹ്യഭാഗത്ത് വരുന്നതിനാല്‍ തുടക്കത്തില്‍ ലക്ഷണങ്ങള്‍ കാണിക്കണമെന്നില്ല. നേരെ മറിച്ച്‌ കാൻസർ അല്ലാത്ത ബി.പി.എച്ച്‌. ഗ്രന്ഥിയുടെ അന്തർഭാഗത്ത് മൂത്രനാളിക്ക് ചുറ്റും വരുന്നതിനാല്‍ ആരംഭത്തിലേ ലക്ഷണങ്ങള്‍ കാണിക്കുന്നു.
പ്രോസ്റ്റേറ്റ് കാൻസർ മൂർച്ഛിക്കുന്നതനുസരിച്ച്‌ മൂത്ര തടസ്സം, എരിച്ചില്‍, മൂത്രം കൂടെക്കൂടെ പോകുക, അണുബാധ, രക്തത്തിന്റെ അംശം, നട്ടെല്ലിനും മറ്റ് അസ്ഥികള്‍ക്കും വേദന, എല്ല് പൊട്ടുക, വൃക്കകളുടെ പ്രവർത്തനം തകരാറിലാവുക തുടങ്ങിയ ഗുരുതര പ്രശ്നങ്ങള്‍ വന്നേക്കാം.
രോഗ നിർണയം
രോഗലക്ഷണങ്ങള്‍ വിലയിരുത്തിയ ശേഷം ശാരീരിക പരിശോധന, രക്തപരിശോധന, സ്കാനിങ്, ബയോപ്സി എന്നിവ ചെയ്യും.പി.എസ്.എ. പരിശോധന: പി.എസ്.എ. എന്നത് പ്രോസ്റ്റേറ്റ് ഗ്രന്ഥിയില്‍നിന്നും ഉത്പാദിപ്പിക്കുന്ന ഒരു പ്രോട്ടീനാണ്. രക്തത്തില്‍ ഇതിന്റെ അളവ് സാധാരണ 4 നാനോഗ്രാം/മില്ലിലിറ്റർ ആയിരിക്കും. പ്രോസ്റ്റേറ്റ് കാൻസർ രോഗികളില്‍ പി.എസ്.എ. കൂടുതലായി കാണുന്നു. എന്നാല്‍ കാൻസറല്ലാത്ത സാധാരണ മുഴയിലും മൂത്രതടസ്സം, അണുബാധ തുടങ്ങിയ കാരണങ്ങളിലും രക്തത്തില്‍ പി.എസ്.എ. അളവ് കൂടാം. അനുയോജ്യമായ ചികിത്സയ്ക്ക് ശേഷം ഇത് പൂർവസ്ഥിതിയിലാകും. വളരെ കൂടിയ തോതിലുള്ള പി.എസ്.എ. (ഉദാ: 10ല്‍ കൂടുതല്‍), പെട്ടെന്നുള്ള പി.എസ്.എ. വർധന എന്നിവ കണ്ടാല്‍ വിശദ പരിശോധനകള്‍ നടത്തണം.
സ്കാനിങ്: അള്‍ട്രാസൗണ്ട് സ്കാനിങ് മുഖേന പ്രോസ്റ്റേറ്റ് ഗ്രന്ഥിയുടെ വലുപ്പവും മുഴയുടെ സവിശേഷതകളും മനസ്സിലാക്കാൻ കഴിയും. വൃക്ക, മൂത്രസഞ്ചി എന്നിവയുടെ പ്രവർത്തനവും വിലയിരുത്താം.
ബയോപ്സി: മരവിപ്പിച്ചതിന് ശേഷം പ്രത്യേകതരം സൂചി ഉപയോഗിച്ച്‌, മലദ്വാരത്തിലൂടെ നടത്തുന്ന ബയോപ്സി പരിശോധന വഴി രോഗം സ്ഥിരീകരിക്കുന്നു. ബയോപ്സി റിപ്പോർട്ട് പ്രകാരം രോഗം കാഠിന്യം കൂടിയവ, അല്ലാത്തവ എന്ന് തരം തിരിക്കാം
സ്റ്റേജിങ്
രോഗനിർണയത്തിനുശേഷം, സി.ടി., എം.ആർ.ഐ., ബോണ്‍ സ്കാൻ എന്നീ പരിശോധനകള്‍ നടത്തി രോഗം പ്രോസ്റ്റേറ്റ് ഗ്രന്ഥിയില്‍ മാത്രം ഒതുങ്ങിയതാണോ, ചുറ്റുമുള്ള കഴലകളിലേക്കോ മറ്റ് അവയവങ്ങളിലേക്കോ പടർന്നിട്ടുണ്ടോ എന്നു വിലയിരുത്തും. പ്രാരംഭ ദശയിലുള്ള കാൻസർ ഗ്രന്ഥിയില്‍ മാത്രം ഒതുങ്ങിയിരിക്കും. രോഗം മൂർച്ഛിക്കുമ്ബോള്‍ കഴലകളിലേക്കോ അസ്ഥികളിലേക്കോ വ്യാപിക്കും.
ചികിത്സ
ചികിത്സ നിർണയിക്കുന്നതിനു മുൻപ്, രോഗിയുടെ പൊതുവായ ആരോഗ്യസ്ഥിതി, മറ്റ് അനുബന്ധ രോഗങ്ങള്‍ എന്നിവ വിലയിരുത്തും. പ്രാരംഭദശയിലുള്ളതും ഗ്രന്ഥിയില്‍ മാത്രം ഒതുങ്ങിയിരിക്കുന്നതുമായ കാൻസർ സർജറിയിലൂടെ പൂർണമായും സുഖപ്പെടുത്താൻ കഴിയും. ഈ രംഗത്ത് കീഹോള്‍ സർജറി, റോബോട്ടിക് സർജറി തുടങ്ങിയ ആധുനിക സാങ്കേതിക രീതികള്‍ വന്നുകഴിഞ്ഞു. ആരംഭദശയില്‍ത്തന്നെ, ശസ്ത്രക്രിയ സാധ്യമല്ലാത്തവർക്കും ശസ്ത്രക്രിയ വിജയിക്കാത്തവർക്കും റേഡിയേഷൻ ചികിത്സ നടത്തുവാൻ കഴിയും. നൂതന റേഡിയേഷൻ സംവിധാനങ്ങള്‍ വഴി മികച്ച രീതിയില്‍, പാർശ്വഫലങ്ങള്‍ കുറച്ചുകൊണ്ട് റേഡിയേഷൻ ചികിത്സ ലഭ്യമാണ്. ശസ്ത്രക്രിയയ്ക്കും റേഡിയേഷനും ശേഷം ഇടവിട്ടുള്ള കാലയളവില്‍ തുടർപരിശോധന നടത്തേണ്ടതാണ്.
കൂടിയ സ്റ്റേജിലുള്ള കാൻസർ പ്രധാനമായും ഹോർമോണ്‍ ചികിത്സവഴി സുഖപ്പെടുത്തുവാനോ, തടുത്തുനിർത്തുവാനോ കഴിയും. പുരുഷഹോർമോണ്‍ പ്രോസ്റ്റേറ്റ് കാൻസർ കോശങ്ങളെ ഉദ്ദീപിപ്പിക്കും. ഹോർമോണുകളുടെ പ്രവർത്തനം തടയുന്നതിനായി ചെറിയ ശസ്ത്രക്രിയയിലൂടെ വൃഷണങ്ങള്‍ നീക്കം ചെയ്യുകയോ കുത്തിവെപ്പുകള്‍ നടത്തുകയോ ചെയ്യാം. ഹോർമോണ്‍ തടയാനുള്ള മരുന്നുകളും കഴിക്കേണ്ടതാണ്.
അസുഖം എല്ലുകളിലേക്ക് പടർന്നാല്‍ ഭവിഷ്യത്തുകള്‍ തടയാനായി ബിസ്ഫോസ്ഫണേറ്റ് ഗ്രൂപ്പില്‍പ്പെട്ട മരുന്നുകള്‍ ഉപയോഗിക്കും. രോഗം കൂടിയ അവസ്ഥയിലെത്തുകയും ഹോർമോണ്‍ ചികിത്സകൊണ്ട് ഫലം കിട്ടാതെ വരികയും ചെയ്യുമ്ബോള്‍ കീമോതെറാപ്പി ചികിത്സ ചെയ്യും. പുതിയ മരുന്നുകളായ ഡോസി ടാക്സല്‍, കബാസി ടാക്സല്‍, അബിറാട്ടറോണ്‍ എന്നിവ രോഗം നിയന്ത്രിക്കാനും രോഗ ലക്ഷണങ്ങളില്‍നിന്നു മോചനം ലഭിക്കാനും സഹായിക്കും.
നേരത്തെ കണ്ടെത്തലും പ്രതിരോധവും
പ്രായമായവരില്‍ പി.എസ്.എ. ടെസ്റ്റും ശാരീരിക പരിശോധനകള്‍ വഴിയും പ്രോസ്റ്റേറ്റ് കാൻസർ നേരത്തെ കണ്ടെത്താം. 50 വയസ്സിനു മേല്‍ പ്രായമുള്ളവർ മെഡിക്കല്‍ ചെക്കപ്പിന്റെ ഭാഗമായി പി.എസ്.എ. ടെസ്റ്റു ചെയ്യുന്നത് സാധാരണമാണ്. ടെസ്റ്റ് റിസള്‍ട്ടില്‍ അസ്വാഭാവികതയുള്ളവർ കൂടുതല്‍ പരിശോധന നടത്തണം.
കൊഴുപ്പ് കുറഞ്ഞ ആരോഗ്യകരമായ ഭക്ഷണരീതിയും ചിട്ടയായ വ്യായാമവും പ്രോസ്റ്റേറ്റ് കാൻസർ സാധ്യത കുറയ്ക്കുന്നതായി കാണുന്നു. അടുത്ത ബന്ധുക്കള്‍ക്ക് അസുഖമുണ്ടായിരുന്നവർക്ക് നേരത്തേയുള്ള പരിശോധനകള്‍ ഗുണകരമായിരിക്കും.
