പാലാ നഗരത്തിലെ നടപ്പാത കയ്യേറ്റങ്ങൾക്കും അനധികൃത പാർക്കിംഗുകൾക്കും എതിരെ നടപടി വേണം; നിയമം നടപ്പിലാക്കേണ്ട പോലീസും നടപ്പാത കൈയ്യേറി വാഹനം പാർക്ക് ചെയ്യുന്നു

പാലാ: പാലാ നഗരത്തിലെ മുഴുവൻ നടപ്പാത കൈയ്യേറ്റങ്ങളും ഒഴിപ്പിക്കണമെന്ന് വി ഫോർ പാലാ രൂപീകരണ യോഗം ആവശ്യപ്പെട്ടു. നഗരത്തിലെ നിരവധി പ്രദേശങ്ങളിൽ വ്യാപാര സ്ഥാപനങ്ങൾ നടപ്പാതകൾ കൈയ്യടക്കി വച്ചിരിക്കുകയാണ്. അധികൃതരുടെ മൗനാനുവാദത്തോടെയാണ് ഇത്തരം നടപടികളെന്ന് യോഗം ചൂണ്ടിക്കാട്ടി.

ചിലയിടങ്ങളിൽ നടപ്പാതകൾ സ്ഥാപനങ്ങളുടെ താത്പര്യാർത്ഥം കോൺക്രീറ്റിംഗ് വരെ നടത്തി സ്വന്തമാക്കിയിരിക്കുകയാണ്. സ്ഥാപനങ്ങൾക്കു പുറമേ സ്വകാര്യ വാഹനങ്ങളും സർക്കാർ വാഹങ്ങളും നടപ്പാത കൈയ്യേറി പാർക്കിംഗ് നടത്തുന്നത് പാലായിൽ നിത്യ സംഭവമായി മാറി.

പാലാ തൊടുപുഴ റൂട്ടിൽ കെ എസ് ആർ ടി ബസ് സ്റ്റേഷന് എതിർവശം നടപ്പാതയിൽ പാർക്ക് ചെയ്യുന്ന പൊലീസ് ജീപ്പ് 

നിയമം നടപ്പിലാക്കേണ്ട പോലീസും നടപ്പാത കൈയ്യേറി വാഹനം പാർക്ക് ചെയ്യുന്ന കാഴ്ചയാണ് ഇപ്പോൾ കാണുന്നത്. നിയമം കാക്കേണ്ടവർതന്നെ നിയമം ലംഘിക്കുന്ന അവസ്ഥയാണ് പാലായിലെ വിവിധയിടങ്ങളിൽ കാണുന്നത്. ഇതുമൂലം വിദ്യാർത്ഥികളടക്കമുള്ള കാൽനടക്കാർ ദുരിതത്തിലാണ്.

മിക്കയിടത്തും അനധികൃത പാർക്കിംഗും കൈയ്യേറ്റവുംമൂലം കാൽനടക്കാർ അപകടകരമായ രീതിയിൽ റോഡിലൂടെ നടക്കേണ്ടി വരികയാണ്. പലപ്പോഴും വലിയ അപകടങ്ങളിൽ നിന്നും രക്ഷപെടുന്നത് ഭാഗ്യത്തിനാണ്. ചിലയിടങ്ങളിൽ റോഡും നടപ്പാതയും വേർതിരിച്ചു കൊണ്ട് സ്ഥാപിച്ചിരുന്ന റെയിലിംഗുകൾ സ്ഥാപനയുടമകൾക്കു വേണ്ടി പൊളിച്ചുമാറ്റി നൽകിയിട്ടുണ്ട്.

പാലാ അൽഫോൻസാ കോളജിനു എതിർവശം സ്വകാര്യ വാഹനസർവ്വീസ് സ്റ്റേഷനു മുന്നിൽ ഫുട്പാത്ത് കൈയ്യേറി നടത്തുന്ന അനധികൃത പാർക്കിംഗ്

മറ്റു ചിലയിടങ്ങളിൽ സ്വകാര്യ സ്ഥാപനങ്ങളിലെ സെക്യൂരിറ്റി ജീവനക്കാർ വാഹനങ്ങൾ തടഞ്ഞ് ഗതാഗതം നിയന്ത്രിക്കുന്നുമുണ്ട്. കെട്ടിട നിർമ്മാണ ചട്ടത്തിനു വിരുദ്ധമായി പാർക്കിംഗ് ഏരിയകൾ കെട്ടിമറച്ചെടുത്ത ചില സ്ഥാപനങ്ങളും ഫുട്പാത്തുകൾ കൈയ്യേറി പാർക്കിംഗ് നടത്തുന്നുണ്ട്.

കെട്ടിട നിർമ്മാണ ചട്ടപ്രകാരമുള്ള പാർക്കിംഗ് ഏരിയകൾ ഇല്ലാത്ത കെട്ടിടങ്ങളുടെ പെർമിറ്റ് റദ്ദാക്കണമെന്നു യോഗം നിർദ്ദേശിച്ചു. പാലാ നഗരത്തിലെ നടപ്പാത കയ്യേറ്റം, അനധികൃത പാർക്കിംഗ് ഇവയുടെ ചിത്രങ്ങൾ തയ്യാറാക്കി അധികൃതർക്കു കൈമാറും.

പാലാ കൊട്ടാര മുറ്റത്ത് നടപ്പാത കൈയ്യേറിയുള്ള പാർക്കിംഗ്

‘നടപ്പാത കാൽനടയാത്രികർക്ക്’ എന്ന പേരിൽ പ്രചാരണം ആരംഭിക്കാനും തീരുമാനിച്ചു. കൺവീനർ എബി ജെ ജോസ് അധ്യക്ഷത വഹിച്ചു. ബിനു പെരുമന, അനൂപ് ചെറിയാൻ, ജോബി മാത്യു, അമൽ ജോസഫ്, ജോസ് തോമസ്, വിദ്യാധരൻ വി റ്റി തുടങ്ങിയവർ പ്രസംഗിച്ചു.