പൊതിച്ചോറ് കവര്‍ന്നെടുക്കാന്‍ ശ്രമം; ഉച്ചഭക്ഷണം കവര്‍ന്നെടുക്കുന്നത് തടഞ്ഞ അശരണനായ വയോധികനെ കുത്തി പരിക്കേല്‍പ്പിച്ച പ്രതി പിടിയില്‍

സ്വന്തം ലേഖിക
തിരുവനന്തപുരം: ഉച്ചഭക്ഷണം കവര്‍ന്നെടുക്കുന്നത് തടഞ്ഞ അശരണനായ വയോധികനെ കുത്തി പരിക്കേല്‍പ്പിച്ച യുവാവ് പിടിയിലായി. തിരുവനന്തപുരം വിഴിഞ്ഞം പൊലീസ് സ്‌റ്റേഷന് സമീപം കരയടിവിള തോട്ടുംകര വീട്ടില്‍ ജോസ് (39) ആണ് പിടിയിലായത്.

കഴിഞ്ഞ ദിവസം ഉച്ചയ്ക്ക് കൊല്ലം പാര്‍വ്വതി മില്ലിന്റെ മുന്നിലാണ് സംഭവം. വയോധികന്‍ ഉള്‍പ്പെടെയുള്ള നാലുപേര്‍ക്ക് സമീപത്തെ ദേവാലയത്തിലെത്തിയ സ്ത്രീ ഭക്ഷണപ്പൊതി നല്‍കിയിരുന്നു.

അവിടെ എത്തിയ ജോസ് പൊതിച്ചോറ് കവര്‍ന്നെടുക്കാന്‍ ശ്രമിക്കുകയും തടസം നിന്ന വയോധികനെ സമീപത്ത് കിടന്ന കുപ്പി പൊട്ടിച്ച് നെഞ്ചില്‍ ആഴത്തില്‍ കുത്തുകയുമായിരുന്നു.

ഗുരുതരമായി പരിക്കേറ്റ ഇയാളെ വഴി യാത്രക്കാരും മറ്റും ചേര്‍ന്ന് ജില്ലാ ആശുപത്രിയിലെത്തിച്ചു. രക്ഷപ്പെടാന്‍ ശ്രമിച്ച ജോസിനെ പൊലീസ് സംഘം സംഭവ സ്ഥലത്തുനിന്ന് പിടികൂടുകയായിരുന്നു.