ഏറ്റവും ആഡംബരമേറിയ ഐഫോൺ എത്തുന്നു : മുതലയുടെ തൊലി ,18 കാരറ്റ് സ്വർണ്ണം,137 വജ്രകല്ലുകൾ ; വില 17 ലക്ഷം

സ്വന്തം ലേഖിക

ഭൂമിയിലെ ഏറ്റവും ആഡംബരമേറിയ ഐഫോൺ എത്തുന്നു. ജനപ്രിയ ഉപകരണങ്ങളുടെ ആഡംബര പതിപ്പുകൾ നിർമിച്ച് വിൽക്കുന്ന സ്വീഡിഷ് കമ്പനിയായ ഗോൾഡൻ കൺസെപ്റ്റാണ് ഈ ആഡംബര ഐഫോണിന്റെയും നിർമ്മാണ ചുമതല. മുതലയുടെ തൊലി, 18 കാരറ്റ് സ്വർണത്തിൽ നിർമിച്ച തലയോട്ടി, 137 വജ്രങ്ങൾ എന്നിവയൊക്കെ ചേർത്താണ് ഈ ഫോൺ നിർമ്മിച്ചത്. 17 ലക്ഷത്തിലധികം രൂപയാണ് ഈ ഫോണിന്റെ വില.

ഐഫോൺ ടെൻ എക്സ് മാക്സിന്റെ പിൻഭാഗമാണ് ഗോൾഡൻ കൺസപ്റ്റ് പുതുക്കിപ്പണിതത്. ഇതുവരെ പുറത്തിറക്കിയതിൽ ഇവരുടെ ഏറ്റവും വിലപിടിപ്പുള്ള സൃഷ്ടിയാണ് ഈ ‘ഐഫോൺ ഷുഗർ സ്‌കൾ എഡിഷൻ’. 18 കാരറ്റിന്റെ 110 ഗ്രാം സ്വർണം ഉപയോഗിച്ചാണ് ഇതിലെ തലയോട്ടി നിർമിച്ചത്. ഗോൾഡൻ കൺസപ്റ്റിലെ കലാകാരന്റെ കരവിരുതാണിത്. തലയോട്ടിക്ക് മേൽ 137 വജ്രക്കല്ലുകളും പതിപ്പിച്ചിരിക്കുന്നു. മുതലയുടെ തൊലിയിൽ നിർമിച്ച കവചവും ഇതിന് നൽകിയിരിക്കുന്നത്.

യൂട്യൂബ് ചാനലായ അൺബോക്സ് തെറാപ്പിയിൽ ഈ ഫോൺ ചിത്രീകരിച്ചിട്ടുണ്ട്. ഭൂമിയിലെ ഏറ്റവും ആഡംബരമേറിയ ഐഫോൺ എന്നാണ് ഈ ഐഫോണിനെ അൺബോക്സ് തെറാപ്പി യൂട്യൂബർ വിശേഷിപ്പിക്കുന്നത്. ഈ ആഡംബര മൊബൈൽ ഫോണിന് ഒരു വർഷം വാറന്റിയുണ്ട്. 30 ദിവസം തിരിച്ച് നൽകാനുള്ള സമയവും നൽകിയിട്ടുണ്ട്.