കാമുകിയുമായി പ്രണയമെന്ന് സംശയം : തർക്കം മൂത്ത് ബിരുദ വിദ്യാർഥിയെ കൗമാരക്കാരൻ കുത്തിക്കൊന്നു

ഡൽഹി: കാമുകിയെ ചൊല്ലിയുള്ള തർക്കത്തെ തുടർന്ന് ബിരുദ വിദ്യാർത്ഥിയെ കൗമാരപ്രായക്കാരൻ കുത്തിക്കൊന്നു. ഡൽഹി യൂണിവേഴ്സിറ്റിയിലെ വിദ്യാർത്ഥി ശുഭം ശ്രീവാസ്തവ(19)യാണ് കൊല്ലപ്പെട്ടത്. അമൻ എന്ന കൗമാരക്കാരനാണ് കൊലയാളി.

ശ്രീവാസ്‌തവും ഒരു പെൺകുട്ടിയും തമ്മിൽ പ്രണയത്തിലായിരുന്നു. അടുത്തിടെ ഇരുവരും തമ്മിൽ അകന്നു. ഈ പെൺകുട്ടിയും അമനും തമ്മിൽ പ്രണയമാണെന്ന സംശയത്തെത്തുടർന്നുള്ള തർക്കമാണ് കൊലപാതകത്തിൽ കലാശിച്ചത്.

ബുധനാഴ്ച വിഷയം ഒത്തുതീർക്കുന്നതിനായി പട്ടേൽ നഗറിലെ റോക് ഗാർഡനിലേക്ക് അമൻ, ശ്രീവാസ്‌തവിനെ വിളിച്ചുവരുത്തി. ഇവിടെ വെച്ച് അമനും സുഹൃത്തുക്കളും ചേർന്ന് ശ്രീവാസ്തവയെയും സുഹൃത്തുക്കളെയും ആക്രമിക്കുകയായിരുന്നു.

ശ്രീവാസ്‌തവിന് ഒപ്പമുണ്ടായിരുന്ന ശുഭം ഗുപ്ത, ലോകേഷ് അഗർവാൾ എന്നിവർക്കും പരിക്കേറ്റു. ഗുരുതരമായി പരിക്കേറ്റ ശ്രീവാസ്‌തവ് ആശുപത്രിയിൽ വച്ച് മരിച്ചു. മറ്റ് രണ്ട് പേർ ഇപ്പോഴും ദില്ലിയിലെ ആർഎംഎൽ ആശുപത്രിയിൽ ചികിത്സയിൽ കഴിയുകയാണ്.