സ്കൂളിലേക്ക് പോകവേ വിദ്യാർഥിയെ കാറിടിച്ചു അപകടം: കാറിനും മതിലിനും ഇടയിൽ കുടുങ്ങിക്കിടന്ന വിദ്യാർത്ഥി ഗുരുതര പരിക്കുകളോടെ ചികിത്സയിൽ

മലപ്പുറം: മലപ്പുറം തിരൂരിൽ നിയന്ത്രണം നഷ്ടപെട്ട കാറിടിച്ച് ഏഴ് വയസ്സുകാരന് ഗുരുതര പരിക്ക്. തലക്കടത്തൂർ സ്വദേശി സമീറിൻറെ മകൻ മുഹമ്മദ് റിക്സാനാണ് പരിക്കേറ്റത്. തലക്കടത്തൂർ ഓവുങ്ങൽ പാറാൾ പള്ളിക്ക് സമീപം ഇന്ന് രാവിലെയാണ് അപകടം.

അപകടത്തിൽപ്പെട്ട വിദ്യാർത്ഥി കാറിനും മതിലിനും ഇടയിൽ കുടുങ്ങി പോവുകയായിരുന്നു. തുടർന്ന് നാട്ടുകാർ ചേർന്ന് കാ‍ർ നീക്കിയ ശേഷം വിദ്യാർത്ഥിയെ പുറത്തെടുക്കുകയായിരുന്നു.

റോഡിൻറെ വലതു വശം ചേർന്ന് സ്കൂളിലേക്ക് പോകുകയായിരുന്ന വിദ്യാർത്ഥിയെ നിയന്ത്രണം തെറ്റി വന്ന കാർ ഇടിക്കുകയായിരുന്നു. ഗുരുതരമായി പരിക്കേറ്റ വിദ്യാർത്ഥിയെ കോട്ടക്കലിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിൽ തിരൂ‍ർ പോലീസ് കേസെടുത്തു അന്വേഷണം ആരംഭിച്ചു.