എം.സി റോഡിൽ കുറിച്ചി ഔട്ട്‌പോസ്റ്റിൽ വാഹനാപകടം: അപകടത്തിൽ പരിക്കേറ്റ് ചികിത്സയിലായിരുന്ന കാവാലം സ്വദേശി മരിച്ചു

സ്വന്തം ലേഖകൻ

കോട്ടയം: എം.സി റോഡിൽ കുറിച്ചി ഔട്ട് പോസ്റ്റിൽ ഡിവൈഡറിൽ ഇടിച്ചു മറിഞ്ഞ ബൈക്ക് യാത്രക്കാരൻ അപകടത്തിൽ മരിച്ചു. കാവാലം കൊച്ചുപറമ്പിൽ കിഷോർകുമാറാ (മനു-23)ണ് മരിച്ചത്.

ശനിയാഴ്ച രാത്രി 11 ന് എം.സി റോഡിൽ കുറിച്ചി മന്ദിരം കവല ഔട്ട് പോസ്റ്റിനു സമീപത്തെ ഡിവൈഡറിൽ ഇടിച്ചാണ് അപകടമുണ്ടായത്. അലുമിനിയം ഫാബ്രിക്കേഷൻ ജോലി ചെയ്യുകയാണ് കിഷോർകുമാർ. ഈ ജോലിയ്ക്കു ശേഷം രാത്രിയിൽ വീട്ടിലേയ്്ക്കു മടങ്ങുകയായിരുന്നു. ഇതിനിടെ നിയന്ത്രണം വിട്ട ബൈക്ക് എം.സി റോഡിലെ ഡിവൈഡറിൽ ഇടിച്ചു കയറുകയായിരുന്നു.

ഇടിയുടെ ആഘാതത്തിൽ റോഡിൽ തലയിടിച്ചു വീണ കിഷോറിനെ പൊലീസ് വാഹനത്തിലാണ് മെഡിക്കൽ കോളേജ് ആശുപത്രിയിൽ എത്തിച്ചത്. ഞായറാഴ്ച രാവിലെ ഒൻപത് മണിയോടെ മരണം സംഭവിച്ചു. ചിങ്ങവനം പൊലീസ് കേസെടുത്തു.