കോട്ടയം കോഴിച്ചന്ത റോഡിലെ മൊബൈൽ കടയിൽ ഫോൺ ബാറ്ററി പൊട്ടിത്തെറിച്ച് അപകടം ; ആളപായമില്ല

സ്വന്തം ലേഖിക

കോട്ടയം: കോഴിച്ചന്ത റോഡിലെ മൊബൈൽ ഷോപ്പിൽ ഫോൺ ബാറ്ററി പൊട്ടിത്തെറിച്ച് അപകടം. കേടായതിനെ തുടർന്ന് നന്നാക്കാൻ എത്തിച്ച മൊബൈൽ ഫോണിന്റെ ബാറ്ററിയാണ് വൻ ശബ്ദത്തോടെ പൊട്ടിത്തെറിച്ചത്. കടയിലുണ്ടായിരുന്ന ഇതരസംസ്ഥാന തൊഴിലാളികളായ ഇടപാടുകാരും, ജീവനക്കാരും തലനാരിഴയ്ക്കാണ് അപകടത്തിൽ നിന്നും രക്ഷപെട്ടത്.

ആറോളം ഇതര സംസ്ഥാന തൊഴിലാളികൾ സ്ഥാപനത്തിൽ എത്തി ഇവരുടെ കയ്യിലുണ്ടായിരുന്ന മൊബൈൽ ഫോണിന്റെ ബാറ്ററിയ്ക്ക് ചാർജ് നിൽക്കുന്നില്ലന്ന് പരാതിപ്പെട്ടു. ഇത് പരിശോധിക്കുന്നതിനായി സ്ഥാപനത്തിലെ ടെക്‌നീഷ്യൻ ബാറ്ററി ഊരി പുറത്ത് വച്ച് ഫോൺ ഇദ്ദേഹം പരിശോധിച്ചു.

ഇതിനിടെ സ്ഥാപനത്തിൽ എത്തിയ ഇതര സംസ്ഥാന തൊഴിലാളികളിൽ ഒരാൾ ബാറ്ററിയുടെ വീർത്തു നിന്ന ഭാഗത്ത് അമർത്തി. ഇതോടെ വൻ ശബ്ദത്തോടെ ബാറ്ററി പൊട്ടിത്തെറിക്കുകയായിരുന്നു.