കോട്ടയം കളക്ട്രേറ്റിനുള്ളിൽ കത്തിവീശി വിദ്യാർത്ഥി സംഘം; എംപ്ലോയ്മെൻറ് എക്സ്ചേഞ്ചിൽ ക്യൂ നിൽക്കുന്നതിനേ ചൊല്ലിയുള്ള തർക്കം അടിയിൽ കലാശിച്ചു
സ്വന്തം ലേഖകൻ
കോട്ടയം: എംപ്ലോയ്‌മെന്റ് എക്‌സ്‌ചേഞ്ചില്‍ ക്യൂ നില്‍ക്കുന്നതിനിടെ കാലില്‍ ചവിട്ടിയതിനെച്ചൊല്ലി ജില്ലാ കളക്ടറേറ്റ് വളപ്പില്‍ വിദ്യാര്‍ത്ഥി സംഘത്തിന്റെ കത്തിവീശലും ഭീഷണിയും
കാലില്‍ ചവിട്ടിയതായി ആരോപിച്ച്‌ വിദ്യാര്‍ത്ഥി സംഘം മര്‍ദ്ദിച്ച യുവാവ് സുഹൃത്തുക്കളെ വിളിച്ചു വരുത്തിയതോടെ ഇവരില്‍ ഒരാള്‍ കളക്ടറേറ്റ് വളപ്പില്‍ കത്തിവീശി.
Whatsapp Group 1 | Whatsapp Group 2 |Telegram Group
സംഭവത്തില്‍ പരിക്കേറ്റ രണ്ടു വിദ്യാര്‍ത്ഥികള്‍ ജില്ലാ ജനറല്‍ ആശുപത്രിയില്‍ പ്രാഥമിക ചികിത്സ തേടി.
ഇവര്‍ ഈസ്റ്റ് പൊലീസ് സ്‌റ്റേഷനില്‍ പരാതി നല്‍കിയിട്ടുണ്ട്.
ഇന്നലെ വൈകിട്ട് നാലു മണിയോടെയായിരുന്നു സംഭവം. പത്താം ക്ലാസ് പരീക്ഷ പാസായ വിദ്യാര്‍ത്ഥികളാണ് എംപ്ലോയ്‌മെന്റ് എക്‌സ്‌ചേഞ്ചില്‍ പേര് രജിസ്റ്റര്‍ ചെയ്യാന്‍ എത്തിയത്.
വിദ്യാര്‍ത്ഥികള്‍ ക്യൂ നില്‍ക്കുന്നതിനിടെ ചെങ്ങളം സ്വദേശിയായ വിദ്യാര്‍ത്ഥിയുടെ കാലില്‍ വടവാതൂര്‍ സ്വദേശിയായ വിദ്യാര്‍ത്ഥി ചവിട്ടി.
ഇതേ ചൊല്ലിയുണ്ടായ തര്‍ക്കത്തിനിടെ വടവാതൂര്‍ സ്വദേശിയായ വിദ്യാർത്ഥിയെ ചെങ്ങളം സ്വദേശിയും, സുഹൃത്തുക്കളും ചേര്‍ന്നു മര്‍ദ്ദിക്കുകയും അസഭ്യം പറയുകയും ചെയ്തു. ഇതില്‍ ക്ഷുഭിതനായ വടവാതൂര്‍ സ്വദേശി തന്റെ സുഹൃത്തുക്കളെ വിളിച്ചുവരുത്തി.
ഇതില്‍ ഒരാള്‍ കത്തിയുമായാണ് കളക്‌ടറേറ്റിനുള്ളില്‍ കടന്നുകയറിയത്. തുടര്‍ന്നു, ഡിവൈ.എസ്.പി ഓഫിസിനു സമീപത്തെ ഇടനാഴിയില്‍ വച്ച്‌ ഇരുകൂട്ടരും തമ്മില്‍ ഏറ്റുമുട്ടി. ഇതിനിടെ സംഘത്തിലെ ഒരു വിദ്യാര്‍ത്ഥി കൈയിലിരുന്ന കത്തി വീശുകയായിരുന്നു.
സംഘര്‍ഷമറിഞ്ഞ് ഡിവൈ.എസ്.പി ഓഫിസില്‍ നിന്നടക്കം പൊലീസ് സംഘം സ്ഥലത്തെത്തി. ഇതോടെ വിദ്യാര്‍ത്ഥികള്‍ ചിതറിയോടി. തുടര്‍ന്നു പൊലീസെത്തി സംഘത്തിലെ ഒരാളെ പിടികൂടുകയും ചെയ്തു.
