‘ഞാൻ പ്രതികരിച്ചാലും ഇവിടെ അത് ഒരു മാറ്റവും വരുത്തില്ല’ ; ചിലപ്പോഴൊക്ക ചില കാര്യങ്ങൾ വെറുതെ വിടുന്നതാണ് നല്ലത്- പ്രതികരണവുമായി ഗോപി സുന്ദറിന്റെ മുൻ ഭാര്യ

സ്വന്തം ലേഖകൻ

കഴിഞ്ഞ ദിവസമാണ് സംഗീത സംവിധായകനും ഗായകനുമായ ഗോപി സുന്ദറും ഗായിക അമൃതാ സുരേഷും ഒരുമിച്ചുള്ള ചിത്രം സമൂഹമാധ്യമങ്ങളിൽ ചർച്ചയായത്. തുടർന്ന് ഇരുവരുടെയും ഭൂതകാലത്തെ കുറിച്ച് സമൂഹമാധ്യമങ്ങളിൽ ആരാധകർ ചികയാൻ തുടങ്ങി.

സംഭവത്തിൽ ആദ്യം ആരാധകർ എത്തിയത് ബാലയുടെ ഇൻസ്റ്റാഗ്രാം, ഫേസ്ബുക്ക് പേജുകളിലാണ്. സംഭവത്തെപ്പറ്റി പ്രതികരിക്കാൻ പലരും ബാലയോട് ആവശ്യപ്പെട്ടു. ഒടുവിൽ പ്രതികരണവുമായി ബാല എത്തുകയും ചെയ്തു. അത് തന്റെ ലൈഫ് അല്ല എന്നാണ് ബാല ഇതിനോട് പ്രതികരിച്ചത്. തുടർന്ന് ഗോപി സുന്ദറുമായി ലിവിങ് ടുഗെതർ റിലേഷനിൽ ആയിരുന്ന അഭയ ഹിരൺമയി വാർത്തകളിൽ ഇടം നേടി.

ഇപ്പോഴിതാ ഗോപി സുന്ദറിന്റെ ആദ്യ ഭാര്യ പ്രിയയാണ് ഇപ്പോൾ ഈ വിഷയത്തിൽ പ്രതികരണവുമായി രംഗത്തെത്തിയിരിക്കുന്നത്. പ്രിയയുമായുള്ള വിവാഹ ബന്ധം വേർപെടുത്താതെ തന്നെ അഭയ ഹിരൺമയിയുമായി ലിവിങ് ടുഗെതർ റിലേഷനിൽ ആയിരുന്നു ഗോപി സുന്ദർ. ആ ബന്ധവും അവസാനിപ്പിച്ചിട്ടാണ് ഇപ്പോൾ അമൃതയ്ക്കൊപ്പം പ്രണയ ബന്ധം തുടങ്ങിയത്.

പ്രിയയുമായി ഗോപിസുന്ദർ പിരിഞ്ഞുവെങ്കിലും ഇപ്പോഴും തന്റെ സോഷ്യൽ മീഡിയ പേജുകളിൽ നിന്നും ഗോപി സുന്ദറിനൊപ്പമുള്ള ചിത്രങ്ങൾ പ്രിയ പിൻവലിച്ചിട്ടില്ല. ഈ വിഷയം ചർച്ചയായപ്പോൾ പ്രിയ തന്നെ പ്രതികരണവുമായി എത്തിയിരിക്കുകയാണ്. തൻ്റെ ഇൻസ്റ്റാഗ്രാമിലൂടെയാണ് ഗോപി സുന്ദറിൻ്റെ ആദ്യ ഭാര്യയുടെ പ്രതികരണം. പ്രിയ പറഞ്ഞ വാക്കുകൾ ഇങ്ങനെയാണ്.

“ഞാൻ പ്രതികരിച്ചാലും ഇവിടെ അത് ഒരു മാറ്റവും വരുത്തില്ല എന്ന കാര്യം ഞാൻ പതിയെ പഠിക്കുകയാണ്. അതുകൊണ്ടൊന്നും ആളുകൾ എന്നെ പെട്ടെന്ന് സ്നേഹിക്കാനോ ബഹുമാനിക്കാനോ പോകുന്നില്ല, അത് അവരുടെ മനസ്സുകളെ മായാജാല വിദ്യ പോലെ മാറ്റാനും പോകുന്നില്ല. ചിലപ്പോഴൊക്ക ചില കാര്യങ്ങൾ വെറുതെ വിടുന്നതാണ് നല്ലത്.

ആളുകൾ അങ്ങനെ പോകട്ടെ, അടച്ചുപൂട്ടിയിടാനായി ശ്രമിക്കാനോ വിശദീകരണങ്ങൾ ചോദിക്കാനോ ഉത്തരങ്ങൾക്കായി പിറകേ നടക്കുകയോ നമ്മളുടെ അവസ്ഥ അവർ മനസിലാക്കുമെന്ന് ശാഠ്യം പിടിക്കുകയോ ചെയ്യേണ്ടതില്ല.നിങ്ങൾക്ക് ചുറ്റും നടക്കുന്ന കാര്യങ്ങളിൽ ശ്രദ്ധ കൊടുക്കാ​തെ പകരം നിങ്ങളുടെ ഉള്ളിൽ സംഭവിക്കുന്ന കാര്യങ്ങൾക്കായി ശ്രദ്ധിക്കുമ്പോഴാണ് ജീവിതം നന്നായി ജീവിക്കാൻ കഴിയുക എന്ന വസ്തുത ഞാൻ പതിയെ പഠിക്കുകയാണ്. നിങ്ങളും നിങ്ങളുടെ ആന്തരിക സമാധാനത്തിനായി വേണം ഓരോ കാര്യങ്ങൾ ചെയ്യാൻ.”

2001 ൽ ആണ് പ്രിയയും ഗോപി സുന്ദറും തമ്മിലുള്ള വിവാഹം നടന്നത്. രണ്ട് ആൺ മക്കളും ഈ ബന്ധത്തിലുണ്ട്. ഇവരുമൊത്തുള്ള ചിത്രങ്ങളും വൈറലാണ്. പ്രിയയുമായുള്ള ദാമ്പത്യ ജീവിതത്തിന് ഇടയിലാണ് അഭയ ഹിരൺമയിയുമായി ഗോപി സുന്ദർ പ്രണയത്തിലാവുന്നത്. തുടർന്ന് ലിവിങ് റിലേഷനും ആരംഭിക്കുകയായിരുന്നു.

കഴിഞ്ഞ ദിവസമാണ് അമൃത സുരേഷുമായി പ്രണയത്തിലാണ് എന്ന സൂചന നൽകി ഗോപി സുന്ദർ ഇൻസ്റ്റഗ്രാമിൽ പോസ്റ്റ് ഇട്ടത്. അമൃതയുമായി നിൽക്കുന്ന സെൽഫിയാണ് അദ്ദേഹം ഇൻസ്റ്റാഗ്രാമിൽ പങ്കുവച്ചത്. അമൃതയും ഇതേ ചിത്രം പങ്കുവച്ചിരുന്നു. ബാലയുമായുള്ള വിവാഹ മോചനത്തിന് ശേഷം മറ്റൊരു ദാമ്പത്യം വേണ്ട എന്ന നിലപാടിൽ ഉറച്ചു നിൽക്കുകയായിരുന്നു അമൃത. എന്നാൽ പ്രണയത്തിലാണ് എന്ന് ഇതുവരെ ഇരുവരും ഔദ്യോഗികമായി പറഞ്ഞിട്ടില്ല.