ഏറ്റുമാനൂർ വെമ്പള്ളിയിൽ നിയന്ത്രണം വിട്ട ബൈക്കും സ്‌കൂട്ടറും കൂട്ടിയിടിച്ചു; മൂന്ന് പേർക്ക് പരിക്ക്

സ്വന്തം ലേഖിക

വെമ്പള്ളി: ഏറ്റുമാനൂർ വെമ്പള്ളിയിൽ നിയന്ത്രണം വിട്ട ബൈക്കും സ്‌കൂട്ടറും കൂട്ടിയിടിച്ച് മൂന്ന് പേർക്ക് പരിക്ക്.

സ്‌കൂട്ടർ യാത്രക്കാരനും തമിഴ്‌നാട് സ്വദേശിയുമായ മാരൻ, ഇയാൾക്കൊപ്പമുണ്ടായിരുന്ന തമിഴ്‌നാട് സ്വദേശിയായ സുഹൃത്ത്, ബൈക്ക് യാത്രക്കാരൻ പുതുപ്പള്ളി സ്വദേശി മനു കെ.ജോൺ എന്നിവർക്കാണ് പരിക്കേറ്റത്.

വെള്ളിയാഴ്ച പുലർച്ചെ ആറേകാലോടെയായിരുന്നു അപകടം. ഏറ്റുമാനൂർ ഭാഗത്തു നിന്നും വെമ്പള്ളി ഭാഗത്തേക്ക് പോകുകയായിരുന്ന ബൈക്ക് എതിർ ദിശയിൽ നിന്നും എത്തിയ സ്‌കൂട്ടറിൽ ഇടിക്കുകയായിരുന്നു. ഇടിയുടെ ആഘാതത്തിൽ ഇരുവരും റോഡിൽ തെറിച്ചു വീണു.

വിവരം അറിഞ്ഞ് എത്തിയ ഹൈവേ പെട്രോളിംങ് സംഘം പരിക്കേറ്റവരെ മെഡിക്കൽ കോളേജ് ആശുപത്രിയിൽ എത്തിച്ചു. പരിക്കേറ്റവർ അപകടനില തരണം ചെയ്തിട്ടില്ലെന്നാണ് സൂചന.