ഭര്‍ത്താവിന്റെ അഴുകിയ മൃതദേഹത്തിന് കാവലിരുന്ന് ഭാര്യ; വയോധികൻ്റെ മരണത്തില്‍ ദുരൂഹത

സ്വന്തം ലേഖിക

ആലപ്പുഴ: ഭർത്താവിൻ്റെ അഴുകിയ മൃതദേഹത്തിന് കാവലിരുന്ന് എൺപതു വയസുകാരി ഭാര്യ.

മുതുകുളം തെക്ക് ലൗ ഡേയില്‍ സ്റ്റാലിനെ(84)യാണ് ചൊവ്വാഴ്ച വൈകീട്ട് വീടിനുളളില്‍ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയത്.

കട്ടിലിനോടു ചേര്‍ന്ന് താഴെ കമഴ്ന്നു കിടക്കുന്ന നിലയിലായിരുന്നു മൃതദേഹം. അഴുകി തുടങ്ങിയ മൃതദേഹത്തിനു രണ്ടു ദിവസത്തോളം പഴക്കമുണ്ട്.

കട്ടിലില്‍ ഭാര്യ ത്രേസ്യാമ കാവലായി ഇരിപ്പുണ്ടായിരുന്നു. ഇവരെ ഹരിപ്പാട് താലൂക്ക് ആശുപത്രിയിലേക്കു മാറ്റി.

ബുധനാഴ്ച വിരലടയാള-ഫോറന്‍സിക് വിദഗ്ധരെത്തി തെളിവുകള്‍ ശേഖരിക്കും.

ഇതിനുശേഷം മാത്രമേ മൃതദേഹ പരിശോധന നടത്തുകയുളളൂ. മുറി പോലീസ് സീല്‍ ചെയ്തു.