സ്കൂള്‍ വിദ്യാർഥിയെ ഉപദ്രവിക്കാൻ ശ്രമിച്ച കേസ് ; സ്വകാര്യ ബസ് കണ്ടക്ടർ അറസ്റ്റിൽ

കൊല്ലം: സ്കൂള്‍ വിദ്യാർഥിയെ ഉപദ്രവിച്ച ബസ് കണ്ടക്ടർ പൊലീസ് പിടിയിലായി. ഇരവിപുരം വാളത്തുങ്കല്‍ മംഗലത്ത് തൊടിയില്‍ മനുവാണ് (27) കൊല്ലം വെസ്റ്റ് പൊലീസിന്‍റെ പിടിയിലായത്.

കഴിഞ്ഞ 21ന് മാമൂട്ടില്‍കടവ്-കൊട്ടിയം റൂട്ടിലോടുന്ന ബസില്‍ യാത്ര ചെയ്യുകയായിരുന്ന വിദ്യാർഥിയെ ബസിലെ കണ്ടക്ടർ ഉപദ്രവിച്ചിരുന്നു. ഇതേ ബസില്‍വെച്ച്‌ മറ്റൊരു ദിവസം ഈ വിദ്യാർഥിയെ കണ്ടക്ടർ ഉപദ്രവിക്കാൻ ശ്രമിക്കുകയും ഭീഷണിപ്പെടുത്തുകയും ചെയ്തു.

വിദ്യാർഥി പൊലീസില്‍ നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റർ ചെയ്ത് പ്രതിയെ അറസ്റ്റ് ചെയ്യുകയായിരുന്നു. കൊല്ലം വെസ്റ്റ് പൊലീസ് ഇൻസ്പെക്ടർ ഫയാസിന്‍റെ നേതൃത്വത്തില്‍ എസ്.ഐമാരായ അൻസാർഖാൻ, എ.എസ്.ഐ ഷാജഹാൻ, എസ്.സി.പി.ഒ ഫെർഡിനൻറ്, സി.പി.ഒ സുരേഷ് എന്നിവരടങ്ങിയ സംഘമാണ് ഇയാളെ അറസ്റ്റ് ചെയ്തത്.