അലൻ ഷുഹൈബിന് എൽഎൽബി പരീക്ഷ എഴുതാൻ അനുമതി; സർവകലാശാല അനുമതി നൽകിയാൽ പരീക്ഷ എഴുതാമെന്ന് ഹൈക്കോടതി വ്യക്തമാക്കിയിരുന്നു

സ്വന്തം ലേഖകൻ

കണ്ണൂർ: പന്തീരാങ്കാവ് യുഎപിഎ കേസിൽ അറസ്റ്റിലായ അലൻ ഷുഹൈബിന് എൽഎൽബി പരീക്ഷ എഴുതാൻ കണ്ണൂർ സർവകലാശാല അനുമതി നൽകി. സർവകലാശാല അനുമതി നൽകിയാൽ അലന് പരീക്ഷ എഴുതാമെന്ന് ഹൈക്കോടതി വ്യക്തമാക്കിയിരുന്നു. ഇതിന് പിന്നാലെയാണ് സർവാകലാശാല അലന് പരീക്ഷ എഴുതാൻ അനുമതി നൽകിയത്.

ഈ മാസം 18 ന് നടത്തുന് രണ്ടാം സെമസ്റ്റർ എൽഎൽബി പരീക്ഷ എഴുതാൻ അനുമതി തേടിയാണ് അലൻ കോടതിയെ സമീപിച്ചത്. സർവകലാശാല അനുമതി നൽകിയാൽ പരീക്ഷ എഴുതാമെന്നായിരുന്നു കോടതി വ്യക്തമാക്കിയത്. ഇക്കാര്യത്തിൽ ഹൈക്കോടതി കണ്ണൂർ സർവകലാശയുടെ വിശദീകരണം തേടിയിരുന്നു.

‘മൂന്നാം സെമസ്റ്റർ പരീക്ഷയെഴുതുന്നതിൽ നിന്ന് വിലക്കിയിട്ടുണ്ട്. എന്നാൽ രണ്ടാം സെമസ്റ്റർ പരീക്ഷയെഴുതുവാൻ അവസരം വേണം. ഒരു വിദ്യാർത്ഥിയെന്നത് പരിഗണിച്ച് ഇതിന് അനുമതി നൽകണം’ എന്നായിരുന്നു അലൻ ഹർജിയിൽ പറഞ്ഞത്. കണ്ണൂർ സർവകലാശാല പാലയാട് ക്യാമ്പസിലെ വിദ്യാർത്ഥിയാണ് അലൻ ഷുഹൈബ്.