ബെംഗളൂരുവിൽ ബൈക്ക്​ അപകടത്തിൽ കണ്ണൂർ സ്വദേശിയായ യുവാവ് മരിച്ചു; ശ്രീരാഗ്​ സഞ്ചരിച്ച ബൈക്കിൽ എതിരെ വന്ന ഓട്ടോ ഇടിച്ചാണ് അ‌പകടം

ബംഗളൂരു: കണ്ണൂർ സ്വദേശിയായ വിദ്യാർഥി ബംഗളൂരുവിൽ ബൈക്ക്​ അപകടത്തിൽ മരിച്ചു. കണ്ണൂർ താഴെ ചൊവ്വ ശ്രീരാഗത്തിൽ സുരേഷ്​ ബാബുവിന്‍റെയും ഷിംനയുടെയും മകൻ കെ.പി. ശ്രീരാഗ്​ (23) ആണ്​ മരിച്ചത്​. എച്ച്​.എസ്​.ആർ. ലേഔട്ടിലെ 360 ടി.എം.ജി ട്രെയ്​നിങ്​ ഇൻസ്റ്റിറ്റ്യൂട്ട്​ വിദ്യാർഥിയാണ്​.

ശനിയാഴ്ച രാത്രി എട്ട്​ മണിയോടെ മഡിവാള താവരകെരെയിലായിരുന്നു അപകടം. ശ്രീരാഗ്​ സഞ്ചരിച്ച ബൈക്കിൽ എതിരെ വന്ന ഓട്ടോ ഇടിക്കുകയായിരുന്നു. സുഹൃത്തുക്കൾ ചേർന്ന്​ ഉടൻ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

മൃതദേഹം സെന്‍റ്​ ജോൺസ്​ ആശുപത്രിയിൽ പോസ്റ്റ്മോർട്ടം നടത്തി. മൃതദേഹം കെ.എം.സി.സി ആംബുലൻസിൽ നാട്ടിലേക്ക്​ കൊണ്ടുപോയി. സംസ്കാരം തിങ്കളാഴ്ച രാവിലെ 11 മണിയോടെ നടക്കുമെന്ന്​ ബന്ധപ്പെട്ടവർ അറിയിച്ചു. സഹോദരങ്ങൾ: ശ്രീ​ദേവി, ശ്രീഹണി.