കോടിമത നാലുവരിപ്പാതയിൽ അപകടം: മഴയിൽ റോഡിൽ തെന്നിമാറി ഫുട്പാത്തിലൂടെ പാഞ്ഞ കാർ ഫ്രൂട്‌സ് കട ഇടിച്ചു തകർത്തു

സ്വന്തം ലേഖകൻ

കോട്ടയം: കോടിമത നാലുവരിപ്പാതയിൽ നിയന്ത്രണം വിട്ട കാർ റോഡിൽ നിന്നും തെന്നിമാറി, ഫുട്പാത്തിലൂടെ പാഞ്ഞ് റോഡരികിലെ ഫ്രൂട്ട്‌സ് കട ഇടിച്ചു തകർത്തു. വ്യാഴാഴ്ച പുലർച്ചെ ആറു മണിയോടെ കോടിമത നാലു വരിപ്പാതയിൽ വിൻസർ കാസിൽ ഹോട്ടലിന് എതിർവശത്തായിരുന്നു സംഭവം. കോട്ടയം നഗരത്തിൽ നിന്നും എത്തിയ കാർ നിയന്ത്രണം വിട്ട് റോഡരികിലെ ഫുട്പാത്തിലേയ്ക്ക് പാഞ്ഞു കയറുകയായിരുന്നു.

തുടർന്ന് സമീപത്തെ ഫ്രൂട്ട്‌സ് കട പൂർണമായും ഇടിച്ചു തകർത്തു. കാറിന്റെ എയർ ബാഗുകൾ കൃത്യ സമയത്ത് വർക്ക് ചെയ്തതിനാൽ അപകടം ഒഴിവായിട്ടുണ്ട്. എന്നാൽ, നാലുവരിപ്പാതയിൽ അമിത വേഗത്തോടൊപ്പം മഴ കൂടി എത്തിയതോടെ അപകട സാധ്യതയും വർധിച്ചിട്ടുണ്ട്. വാഹന യാത്രക്കാർ ഇതുവഴി കടന്നു പോകുമ്പോൾ അതീവ ജാഗ്രത കാട്ടണമെന്ന് മോട്ടോർ വാഹന വകുപ്പ് അധികൃതർ നിർദേശിക്കുന്നു.