ഇൻസ്റ്റഗ്രാമിൽ ബ്ലോക്ക് ചെയ്തതിന് വിദ്യാർത്ഥിനിയെ വഴിയിൽ തടഞ്ഞുനിർത്തി മർദ്ദനവും അസഭ്യവും: യുവാവിനെ പോലീസ് അറസ്റ്റ് ചെയ്തു

കോഴിക്കോട്: സമൂഹമാധ്യമമായ ഇൻസ്റ്റഗ്രാമിൽ ബ്ലോക്ക് ചെയ്തതിന് വിദ്യാർത്ഥിനിയെ വഴിതടഞ്ഞ് അസഭ്യം പറയുകയും മർദിക്കുകയും ചെയ്ത യുവാവ് അറസ്റ്റിൽ. ചെങ്ങോട്ടുകാവ് മേലൂർ കച്ചേരിപ്പാറ സ്വദേശി സജിൽ ആണ് പിടിയിലായത്. കൊയിലാണ്ടിയിലാണ് സംഭവം.

വിദേശത്ത് ജോലി ചെയ്യുന്ന സജിൽ ഇൻസ്റ്റാഗ്രാം വഴി സ്ഥിരമായി മെസ്സേജ് അയച്ച് പെൺകുട്ടിയെ ശല്യപ്പെടുത്തുമായിരുന്നു. തുടർന്ന് ഇയാളെ ഇൻസ്റ്റഗ്രാമിൽ ബ്ലോക്ക് ചെയ്തു.

രണ്ട് ദിവസം മുൻപ് വിദേശത്തുനിന്ന് എത്തിയ സജിൽ ക്ലാസ്സ് കഴിഞ്ഞു വരികയായിരുന്നു വിദ്യാർത്ഥിയെ വീടിന് സമീപത്തുവെച്ച് തടഞ്ഞു നിർത്തി. ഇൻസ്‌റ്റഗ്രാമിൽ ബ്ലോക്ക് ചെയ്തത് ചൂണ്ടിക്കാട്ടി ഇയാൾ കുട്ടിയോട് അസഭ്യം പറയുകയും മർദിക്കുകയുമായിരുന്നു.

സംഭവത്തിൽ പരിക്കേറ്റ വിദ്യാർത്ഥി കൊയിലാണ്ടി പോലീസിൽ പരാതി നൽകി. പിന്നാലെയാണ് സജിലിനെ പോലീസ് അറസ്റ്റ് ചെയ്തത്. മൂടാടിയിലുളള സ്വകാര്യ കോളേജ് വിദ്യാർത്ഥിനിയാണ് പരാതിക്കാരി.