അണ്ടർ 17 സംസ്ഥാന സ്കൂൾ ക്രിക്കറ്റ് ടീമിൽ ഇടംനേടി കുമരകം സ്വദേശിയായ വിദ്യാർത്ഥി

സ്വന്തം ലേഖകൻ

കുമരകം: ദേശീയതല മത്സരങ്ങൾക്കുള്ള അണ്ടർ 17 സംസ്ഥാന സ്കൂൾ ക്രിക്കറ്റ് ടീമിൽ ഇടംനേടി കുമരകം സ്വദേശിയായ വിദ്യാർത്ഥി ചൈതന്യദേവ്. എറണാകുളത്ത് വെച്ച് നടന്ന സംസ്ഥാന സ്കൂൾ കായിക മേളയിൽ ആൺകുട്ടികളുടെ അണ്ടർ -17 ക്രിക്കറ്റ് മത്സരത്തിൽ കോട്ടയം ജില്ലാ ടീമിനായി മൂന്ന് ഇന്നിംഗ്സുകളിലായി മികച്ച ബൗളിംഗും ബാറ്റിംഗും കാഴ്ചവച്ച ചൈതന്യ ദേവ് മികച്ച താരമായി തിരഞ്ഞെടുക്കപ്പെട്ടു.

ഇതെത്തുടർന്നാണ് ദേശീയ സ്കൂൾ ഗെയിംസിൽ പങ്കെടുക്കുന്നതിനുള്ള സംസ്ഥാന ടീമിൽ ചൈതന്യദേവ് തിരഞ്ഞെടുക്കപ്പെട്ടത്. കുമരകം മാഞ്ചിറയിൽ ശരവണൻ-മഞ്ജു ദമ്പതികളുടെ മകനായ ചൈതന്യ ദേവ് കേരള ക്രിക്കറ്റ് അസോസിയേഷന്റെ ആഭിമുഖ്യത്തിലുള്ള വിവിധ മത്സരങ്ങളിൽ പങ്കെടുത്ത് ഇതിന് മുൻപും മികച്ച പ്രകടനം കാഴ്ച വച്ചിട്ടുണ്ട്.

ചങ്ങനാശ്ശേരി ക്രിസ്തുജ്യോതി സ്കൂളിലെ പ്ലസ് വൺ കമ്പ്യൂട്ടർ സയൻസ് വിദ്യാർത്ഥിയായ ചൈതന്യദേവ് പഠനത്തിലും മികച്ച നിലവാരം പുലർത്തി വരുന്നു . ചങ്ങനാശ്ശേരി ഫാത്തിമപുരം വിന്റേജ് ക്രിക്കറ്റ് അക്കാദമിയിലെ മികച്ച പരിശീലനമാണ് ചൈതന്യ ദേവിനെ മികച്ച ക്രിക്കറ്ററായി വളർത്തിയെടുത്തത്. പരിശീലനത്തിന് സൗകര്യം ഒരുക്കുന്നതിനും മത്സരങ്ങളിൽ പങ്കെടുക്കുന്നതിനും ക്രിസ്തുജ്യോതി സ്കൂൾ അധികൃതരിൽ നിന്നും ലഭിച്ച പിന്തുണയും ചൈതന്യദേവിന് ഈ നേട്ടത്തിന് സഹായകരമായി.