ബാറിനു മുൻപിൽ സംഘർഷം, യുവാവിന് ക്രൂരമർദനം: സിമന്റ് കട്ട ഉപയോഗിച്ച് തലക്കടിച്ചു കൊലപ്പെടുത്താൻ ശ്രമിച്ച 6 പേർക്കെതിരെ പോലീസ് കേസെടുത്തു

പത്തനംതിട്ട: കോന്നിയിൽ യുവാവിന് ക്രൂരമർദനം. കോന്നി കുളത്തുമൺ സ്വദേശി സനോജിനാണ് മർദനമേറ്റത്. സിമന്റ് കട്ട കൊണ്ട് തലയ്ക്ക് അടിക്കുകയും നിലത്തിട്ട് ക്രൂരമായി ചവിട്ടുകയും ചെയ്‌തു.

കോന്നിയിലെ സൂര്യ ബാറിന് മുൻപിലായിരുന്നു സംഘർഷം. മദ്യപിച്ചെത്തിയ രണ്ടു സംഘങ്ങൾ തമ്മിലുണ്ടായ വാക്കേറ്റമാണ് സംഘർഷത്തിൽ കലാശിച്ചത്.

ആക്രമണത്തിൽ സനോജിന് സാരമായ പരിക്കേറ്റിട്ടുണ്ട്. പരിക്കേറ്റ സനോജ് ചികിത്സയിൽ കഴിയുകയാണ്. മർദനത്തിൽ ആറു പേർക്കെതിരെ കോന്നി പോലീസ് കേസെടുത്തു. കൊലപാതക ശ്രമം ഉൾപ്പെടെയുള്ള വകുപ്പുകൾ ചുമത്തിയാണ് പോലീസ് കേസെടുത്തിരിക്കുന്നത്.