സ്കൂള്‍ വിദ്യാർത്ഥിനികളെ ഓട്ടോയില്‍ തട്ടിക്കൊണ്ടുപോകാൻ ശ്രമിച്ചതായി പരാതി ; ഓട്ടോയിൽ നിന്ന് ചാടി രക്ഷപ്പെട്ട വിദ്യാർത്ഥികൾ ഓടി കയറിയത് പോലീസ് സ്റ്റേഷനിലേക്ക് ; അന്വേഷണം ആരംഭിച്ചു
കൊല്ലം : സ്കൂള്‍ വിദ്യാർത്ഥിനികളെ ഓട്ടോയില്‍ തട്ടിക്കൊണ്ടുപോകാൻ ശ്രമിച്ചതായി പരാതി. വിമല ഹൃദയ ഹയർ സെക്കന്ററി സ്കൂളിലെ പ്ലസ് ടു വിദ്യാർത്ഥിനികളെയാണ് തട്ടിക്കൊണ്ടുപോകാൻ ശ്രമിച്ചത്.
കൊല്ലം എസ് എൻ കോളേജിന് സമീപത്ത് വച്ച് ഇന്ന് ഉച്ചയോടെയാണ് സംഭവം. കുട്ടികള്‍ എതിർത്തതോടെ വേഗം കൂട്ടിയ ഓട്ടോറിക്ഷയില്‍ നിന്നും പെണ്‍കുട്ടികള്‍ ചാടി രക്ഷപ്പെടുകയായിരുന്നു.
കൊല്ലം ഈസ്റ്റ് പൊലീസ് സ്റ്റേഷനിലേക്ക് രണ്ട് പെണ്‍കുട്ടികള്‍ പരുക്കുകളോടെ ഓടി കയറി വരുകയായിരുന്നു. വിവരങ്ങള്‍ തിരക്കിയതോടെയാണ് തട്ടിക്കൊണ്ടുപോകാൻ ശ്രമിച്ചതായി വിദ്യാർത്ഥിനികള്‍ പറഞ്ഞത്.
Whatsapp Group 1 | Whatsapp Group 2 |Telegram Group
ട്യൂഷൻ കഴിഞ്ഞ് ഓട്ടോയില്‍ കൈകാണിച്ച്‌ കയറുകയായിരുന്നു. പിന്നാലെ പോകുന്ന വഴി ശരിയായ രീതിയില്‍ അല്ല എന്ന് പെണ്‍കുട്ടികള്‍ ചോദ്യം ചെയ്തതോടെയാണ് ഓട്ടോ വേഗം കൂട്ടിയത്.
ഇതിന് പിന്നാലെയാണ് പെണ്‍കുട്ടികള്‍ ഓട്ടോയില്‍ നിന്ന് ചാടിയത്. ഓട്ടോ ഡ്രൈവർ മോശമായാണ് സംസാരിച്ചതെന്ന് വിദ്യാർത്ഥിനി പറഞ്ഞു.
ഇടവഴിയിലേക്ക് ഓട്ടോ കയറ്റിക്കൊണ്ട് പോകാൻ ശ്രമിച്ചപ്പോള്‍ മെയിൻ റോഡിലൂടെ പോയാല്‍ മതിയെന്ന് ആവശ്യപ്പെട്ടതോടെയാണ് മോശമായി സംസാരിക്കാൻ തുടങ്ങിയതെന്ന് വിദ്യാർത്ഥിനി പറയുന്നു.
മോശമായി സംസാരിച്ചതോടെ ഭയമായെന്നും പിന്നാലെ വണ്ടിയുടെ വേഗത കൂട്ടിയെന്നും വിദ്യാർത്ഥിനി മാധ്യമങ്ങളോട് പറഞ്ഞു. വേഗം കൂട്ടിയതോടെ കൂടെയുണ്ടായിരുന്ന കുട്ടിയോട് വണ്ടിയില്‍ നിന്ന് ചാടാമെന്ന് പറയുകയായിരുന്നു.
വാഹനത്തില്‍ നിന്ന് വീണ് പെണ്‍കുട്ടിയ്ക്ക് പരുക്കേറ്റിട്ടുണ്ട്. സംഭവത്തില്‍ കൊല്ലം ഈസ്റ്റ് പോലീസ് അന്വേഷണമാരംഭിച്ചു.
