ഇന്ത്യയില് ഭരണഘടനയ്ക്ക് മുകളിലല്ല മതവിശ്വാസം; ഒരാളുടെ മതവിശ്വാസം മറ്റൊരാളുടെ മേല് അടിച്ചേല്പ്പിക്കാൻ പാടില്ലെന്ന് ഹൈക്കോടതി
കൊച്ചി: ഇന്ത്യയില് ഭരണഘടനക്ക് മുകളിലല്ല മതവിശ്വാസമെന്ന് കേരള ഹൈക്കോടതി.
ഒരാളുടെ മതവിശ്വാസം മറ്റൊരാളുടെ മേല് അടിച്ചേല്പ്പിക്കാൻ പാടില്ലെന്നും ജസ്റ്റിസ് പി.വി.കുഞ്ഞികൃഷ്ണൻ വ്യക്തമാക്കി.
മുൻമന്ത്രി ഡോ. തോമസ് ഐസക്കിന് ഹസ്തദാനം നല്കിയ, മുസ്ലീം പെണ്കുട്ടിയെ അപകീർത്തിപ്പെടുത്തിയെന്ന കേസ് റദ്ദാക്കണമെന്ന് ആവശ്യപ്പെട്ട് കോട്ടക്കല് സ്വദേശി അബ്ദുല് നൗഷാദ് നല്കിയ ഹർജി തള്ളിയാണ് ഹൈക്കോടതി നിരീക്ഷണം.
പെണ്കുട്ടിയുടെ പരാതിയില് കലാപത്തിന് ശ്രമിച്ചുവെന്നതുള്പ്പെടെയുള്ള വകുപ്പുകള് പ്രകാരമാണ് കോഴിക്കോട് കുന്നമംഗലം പൊലീസ് ഇയാള്ക്ക് എതിരെ കേസെടുത്തത്.
Whatsapp Group 1 | Whatsapp Group 2 |Telegram Group
2017ല് കോഴിക്കോട് കാരന്തൂർ മർക്കസ് കോളേജില് അന്ന് ധനമന്ത്രിയായിരുന്ന തോമസ് ഐസക്ക് വിദ്യാർത്ഥികളുമായി സംവാദത്തിന് എത്തിയിരുന്നു. സമ്മാനദാനത്തിനിടെ അദ്ദേഹം വിദ്യാർത്ഥികള്ക്ക് ഹസ്തദാനം നല്കി. കൂട്ടത്തില് എല്എല്ബിക്ക് പഠിക്കുന്ന മുസ്ലീം പെണ്കുട്ടിയുമുണ്ടായിരുന്നു. ഈ ദൃശ്യമടക്കം സാമൂഹികമാധ്യമങ്ങളില് പ്രചരിപ്പിച്ച ഹർജിക്കാരനായ അബ്ദുല് നൗഷാദ് വിദ്യാർത്ഥിനി ശരി അത്ത് നിയമം ലംഘിച്ചെന്ന് ആരോപിക്കുകയും ചെയ്തു.
തുടർന്നാണ് തനിക്കും കുടുംബത്തിനും അപകീർത്തിയുണ്ടാക്കിയെന്ന് കാട്ടി പെണ്കുട്ടി പരാതിപ്പെട്ടതും കുന്ദമംഗലം പൊലീസ് കേസെടുത്തതും. തനിക്കെതിരെ ചുമത്തിയ വകുപ്പുകള് നിലനില്ക്കില്ലെന്ന വാദവുമായാണ് അബ്ദുള് നൗഷാദ് ഹൈക്കോടതിയെ സമീപിച്ചത്.