ഭാര്യയെ പറ്റി അശ്ലീല കമന്റ് പറഞ്ഞതിനേ തുടർന്നുള്ള തർക്കം; നാഗമ്പടം റെയിൽവേ സ്റ്റേഷനു സമീപം ഒറീസ സ്വദേശി വെട്ടേറ്റു മരിച്ചു; പ്രതിയായ ഒറീസക്കാരൻ കസ്റ്റഡിയിൽ

സ്വന്തം ലേഖകൻ

കോട്ടയം: ഭാര്യയെ കുറിച്ച് അശ്ലീല കമന്റ് പറഞ്ഞതിനെച്ചൊല്ലിയുണ്ടായ തർക്കത്തെ തുടർന്ന് കോട്ടയം നാഗമ്പടത്ത് ഒറീസ സ്വദേശി വെട്ടേറ്റു മരിച്ചു. ഒറീസ സ്വദേശിയായ യുവാവാണ് സുഹൃത്തിന്റെ വെട്ടേറ്റ് കൊല്ലപ്പെട്ടത്.

പ്രതിയെന്നു സംശയിക്കുന്ന ഒറീസ സ്വദേശിയെ റെയിൽവേ പൊലീസ് കസ്റ്റഡിയിൽ എടുത്തു. ഇയാൾ രക്ഷപെടാൻ ശ്രമം നടത്തുന്നതിനിടെയാണ് പൊലീസ് പിടികൂടിയത്.

ഞായറാഴ്ച ഉച്ചയോടെയാണ് കോട്ടയം നാഗമ്പടം ഗുഡ്‌ഷെഡ് റോഡിൽ ഇതര സംസ്ഥാന തൊഴിലാളികൾ താമസിക്കുന്ന സ്ഥലത്ത് കൊലപാതകമുണ്ടായത്.

മദ്യലഹരിയിൽ ഇരുവിഭാഗം തൊഴിലാളികൾ തമ്മിൽ ഏറ്റുമുട്ടുകയായിരുന്നു. നഗരത്തിന്റെ വിവിധ ഭാഗങ്ങളിൽ ജോലി ചെയ്യുന്ന അന്യ സംസ്ഥാന തൊഴിലാളികൾ ഗുഡ് ഷെഡ് റോഡിൽ ഞായറാഴ്ച ഒത്തുകൂടുന്നത് പതിവാണ്.

ഇത്തരത്തിൽ ഒത്തുകൂടുന്നതിനിടെയാണ് പ്രതി കയ്യിൽ കരുതിയിരുന്ന കത്തി ഉപയോഗിച്ച് കൊലപ്പെടുത്തുകയായിരുന്നുവെന്നാണ് സൂചന.

ജില്ലാ പൊലീസ് മേധാവി ഡി.ശില്പ ഐ പി എസിന്റെയും ഡിവൈഎസ്.പി ജെ.സന്തോഷ്‌കുമാറിന്റെയും എസ്എച്ച്ഒ . യു ശ്രീജിത്തിന്റെയും നേതൃത്വത്തിലുള്ള പൊലീസ് സംഘം സ്ഥലത്ത് എത്തിയിട്ടുണ്ട്.