കണ്ണൂരില്‍ വീണ്ടും പഴകിയ ഭക്ഷണം പിടികൂടി; കോര്‍പറേഷന്‍ ആരോഗ്യ വകുപ്പ് പരിശോധന തുടരുന്നു

സ്വന്തം ലേഖകൻ

കണ്ണൂർ: നഗരത്തിലെ ഹോട്ടലുകളിലും റസ്റ്റോറൻ്റുകളിലും കോര്‍പറേഷന്‍ ആരോഗ്യ വകുപ്പ് വിഭാഗത്തിൻ്റെ പരിശോധന തുടരുന്നു.

എസ്.എന്‍.പാര്‍ക്ക് റോഡിലെ 9 ഓളം കടകളില്‍ ഹെല്‍ത്ത് ഇന്‍സ്പക്ടര്‍ പ്രേമരാജൻ്റെ നേതൃത്വത്തില്‍ തിങ്കളാഴ്ച കാലത്ത് നടത്തിയ പരിശോധനയില്‍ പഴകിയ പൊറോട്ടെ, ഫ്രൈഡ് റൈസ്, നൂഡില്‍സ് എന്നിവ പിടിച്ചെടുത്തു.

ഹോട്ടല്‍ സാഗര്‍, ബ്ലൂ നൈല്‍ എന്നിവിടങ്ങളില്‍ നിന്നാണ് പഴകിയ ഭക്ഷണ സാധനങ്ങള്‍ പിടികൂടിയത്. എം.വി.കെ.റസ്റ്റോറന്‍റില്‍ നിന്ന് നിരോധിത പ്ലാസ്റ്റിക് കവറുകളും പിടിച്ചെടുത്തിട്ടുണ്ട്.

ജൂനിയര്‍ ഹെല്‍ത്ത് ഇന്‍സ്പക്ടര്‍മാരായ ഉദയകുമാര്‍, റിനില്‍ രാജ് എന്നിവരും പരിശോധനാ സംഘത്തിലുണ്ടായിരുന്നു.