നിയന്ത്രണങ്ങൾക്കിടയിലും ഇന്ന് അക്ഷയ കേന്ദ്രങ്ങള്‍ തുറന്നുപ്രവര്‍ത്തിക്കുന്നതിന് അനുമതി; തീരുമാനം കോവിഡ് മരണ ധനസഹായ അപേക്ഷയെ മുൻനിർത്തി
സ്വന്തം ലേഖകൻ
തിരുവനന്തപുരം: ജില്ലയില്‍ അക്ഷയകേന്ദ്രങ്ങള്‍ ഇന്ന് തുറന്നുപ്രവര്‍ത്തിക്കും. കോവിഡ് മരണ ധനസഹായത്തിന് അപേക്ഷ സ്വീകരിക്കുന്നതിനാണ് ഇന്ന് പ്രവര്‍ത്തനാനുമതി.രേഖകളുമായി അപേക്ഷകള്‍ക്ക് യാത്ര അനുവദിക്കാനും പുതുക്കിയ ഉത്തരവില്‍ പറയുന്നു.
അതേസമയം ഇന്ന് സംസ്ഥാനത്ത് ലോക്ഡൗണിന് സമാനമായ കര്‍ശന നിയന്ത്രണങ്ങളായിരിക്കും ഉണ്ടായിരിക്കുക. അത്യാവശ്യ യാത്രകള്‍ മാത്രമേ അനുവദിക്കൂ. പുറത്തിറങ്ങുന്നവര്‍ കാരണം വ്യക്തമാക്കുന്ന രേഖകളോ സത്യവാങ്മൂലമോ കയ്യില്‍ കരുതണം.
Whatsapp Group 1 | Whatsapp Group 2 |Telegram Group
നിരത്തുകളില്‍ പരിശോധന കര്‍ശനമാക്കും. നിര്‍ദേശങ്ങള്‍ ലംഘിക്കുന്നവര്‍ക്കെതിരെ കടുത്ത നടപടി എടുക്കാന്‍ പൊലീസിന് നിര്‍ദേശം നല്‍കിയിട്ടുണ്ട്. അനാവശ്യമായി പുറത്തിറങ്ങുന്നവര്‍ക്കെതിരെ കേസെടുത്തും. വാഹനം പിടിച്ചെടുക്കും.
വിവാഹ, മരണാനന്തര ചടങ്ങുകളില്‍ 20 പേര്‍ മാത്രമേ പങ്കെടുക്കാവൂ. പഴം, പച്ചക്കറി, പലവ്യഞ്ജനം, പാല്‍, മീന്‍, ഇറച്ചി എന്നിവ വില്‍ക്കുന്ന കടകള്‍ രാവിലെ 7 മുതല്‍ രാത്രി 9 വരെ പ്രവര്‍ത്തിക്കും. ഹോട്ടലിലും ബേക്കറിയിലും പാഴ്‌സല്‍ മാത്രമേ അനുവദിക്കൂ.
മാധ്യമ സ്ഥാപനങ്ങള്‍, മരുന്നുകടകള്‍, ആംബുലന്‍സ് എന്നിവയ്ക്ക് തടസ്സമില്ല. ചികിത്സ, വാക്‌സിനേഷന്‍ എന്നിവയ്ക്കും യാത്രയാകാം. അടിയന്തര സാഹചര്യത്തില്‍ വര്‍ക് ഷോപ്പുകള്‍ തുറക്കാം. ദീര്‍ഘദൂര ബസുകളും ട്രെയിനുകളും സര്‍വീസ് നടത്തും.
