ഏറ്റുമാനൂർ എം.സി റോഡിൽ ബൈക്കും സ്‌കൂട്ടറും കൂട്ടിയിടിച്ചു; പാലാ സ്വദേശിയടക്കം രണ്ടു പേർക്ക് പരിക്ക്

സ്വന്തം ലേഖിക

കോട്ടയം: ഏറ്റുമാനൂരിൽ എം.സി റോഡിൽ ബൈക്കുകൾ തമ്മിൽ കൂട്ടിയിടിച്ച് രണ്ടു പേർക്ക് പരിക്ക്.

പാലാ സ്വദേശി തടവനാൽ ഔസേപ്പച്ചൻ ( 63 ) , പട്ടിത്താനം സ്വദേശി ഷെറിൻ ( 32 ) എന്നിവർക്കാണു പരുക്കേറ്റത്. ഇവരെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

തിങ്കളാഴ്ച വൈകിട്ട് അഞ്ചരയോടെ എം.സി റോഡിൽ ഏറ്റുമാനൂർ ചുമടുതാങ്ങി വളവിനു സമീപമായിരുന്നു അപകടം.

മൂവാറ്റുപുഴയിൽ നിന്നും ഏറ്റുമാനൂർ ഭാഗത്തേയ്ക്കു വരികയായിരുന്ന സ്‌കൂട്ടർ നിയന്ത്രണം വിട്ട് എതിർ ദിശയിൽ എത്തിയ ബൈക്കിൽ ഇടിക്കുകയായിരുന്നു.

പരുക്കേറ്റ ഔസേപ്പച്ചനെയും ഷെറിനെയും നാട്ടുകാരാണ് അതുവഴി വന്ന മറ്റൊരു വാഹനത്തിൽ കോട്ടയം മെഡിക്കൽ കോളേജ് ആശുത്രിയിൽ എത്തിച്ചത്.

ഗുരുതരമായി പരിക്കേറ്റ ഔസേപ്പച്ചനെ വെന്റിലേറ്ററിലേയ്ക്കു മാറ്റി. ഏറ്റുമാനൂർ പൊലീസ് കേസെടുത്തിട്ടുണ്ട്.