ബൈക്ക് അപകടത്തിൽ പരിക്കേറ്റ് ചികിത്സയിലായിരുന്ന യുവാവ് മരിച്ചു: അപകടമുണ്ടായത് മുണ്ടക്കയം പുഞ്ചവയൽ എസ്.വളവിൽ

സ്വന്തം ലേഖകൻ

മുണ്ടക്കയം: ബൈക്ക് അപകടത്തിൽ പരിക്കേറ്റ് ഒരു രാത്രി മുഴുവൻ ചികിത്സയിൽ കഴിഞ്ഞിരുന്ന മുണ്ടക്കയം സ്വദേശിയായ യുവാവ് മരിച്ചു. മുണ്ടക്കയം പുഞ്ചവയൽ പാലക്കുടിയിൽ എബ്രഹാം ബമോളി ദമ്പതികളുടെ മകൻ ലിജോ പി എബ്രഹാം (35) ആണ് മരിച്ചത്.

ഞായറാഴ്ച രാത്രി 10 മണിയോടെ ഉണ്ടായ അപകടത്തിൽ പരിക്കേറ്റ ലിജോ തിങ്കളാഴ്ച രാവിലെ 11 മണിയോടെയാണ് മരിച്ചത്. റേഷൻ വ്യാപാരിയായ ലിജോ വീട്ടിലേയ്ക്കു മടങ്ങുന്നതിനിടെ പുഞ്ചവയലിനു സമീപത്തെ എസ്. വളവ് ഇറക്കത്തിൽ നിയന്ത്രണം നഷ്ടപ്പെട്ട ബൈക്ക് മറിയുകയായിരുന്നു.

തലയ്ക്ക് ഗുരുതരമായി പരിക്കേറ്റ ലിജോയെ മുപ്പത്തിയഞ്ചാം മൈലിലെ സ്വകാര്യ ആശുപത്രിയിൽ ആദ്യം എത്തിച്ചു.

തുടർന്ന് കോട്ടയത്തെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
ഭാര്യ: ഡോണ പി ലിജോ, പറത്താനം പുതിയാപറമ്പിൽ കുംടുംബാംഗം.

മക്കൾ : ജൊവാൻ മരിയ ലിജോ, ജാനറ്റ് ലിജോ. സഹോദരൻ:ഷിജോ പി എബ്രഹാം ( പലചരക്ക് വ്യാപാരി പുഞ്ചവയൽ ). സംസ്‌കാരം ചൊവ്വാഴ്ച വൈകിട്ട് നാലിന് പുഞ്ചവയൽ സെന്റ് സെബാസ്റ്റ്യൻ പള്ളി സെമിത്തേരിയിൽ.