കൊറോണ വൈറസിന്റെ പശ്ചാത്തലത്തിൽ കോടതി നടപടികൾക്കും നിയന്ത്രണം ; പ്രതികളെ കോടതിയിൽ ഹാജരാക്കേണ്ടന്ന് നിർദ്ദേശം

സ്വന്തം ലേഖകൻ

തിരുവനന്തപുരം: കൊറോണ വൈറസ് വ്യാപിക്കുന്ന പശ്ചാത്തലത്തിൽ തിരുവനന്തപുരം ജില്ലയിലെ കോടതി നടപടികളിലും നിയന്ത്രണം ഏർപ്പെടുത്തി. ഇതോടൊപ്പം അത്യാവശ്യ കേസുകൾ മാത്രം പരിഗണിച്ചാൽ മതിയെന്ന് ജില്ലാ ജഡ്ജി നിർദ്ദേശം നൽകിയിട്ടുണ്ട് .

കൂടാതെ പ്രതികളെ ഹാജരാക്കേണ്ടന്ന് ജയിൽ അധികൃതർക്ക് നിർദ്ദേശവും നൽകി.അതാവശ്യ നടപടികൾ വീഡിയോ കോൺഫറൻസ് വഴിയാക്കാനാണ് തീരുമാനം. കൊറോണ വ്യാപകമാകുന്ന പശ്ചാത്തലത്തിൽ സംസ്ഥാനം കനത്ത ജാഗ്രതയിലാണ്.

സംസ്ഥാനത്ത് വിദ്യാഭ്യാസ സ്ഥാപനങ്ങൾ, ആരാധനാലയങ്ങൾ,സിനിമാ തിയേറ്ററുകൾ, തുടങ്ങിയിടങ്ങളിലെല്ലാം നിയന്ത്രണം ഏർപ്പെടുത്തിയിട്ടുണ്ട്. ഏഴാം ക്ലാസ് വരെയുള്ള വിദ്യാർത്ഥികളുടെ പരീക്ഷകൾ പൂർണമായും ഒഴിവാക്കിയിട്ടുണ്ട്. മദ്രസകളടക്കം സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങൾക്കും അവധി നൽകുകയും ചെയ്തിട്ടുണ്ട്. സർക്കാർ പൊതുപരിപാടികളും ചടങ്ങുകളും മാറ്റിവെക്കും.