തിരുവനന്തപുരം: എറണാകുളം – ബംഗളൂരു വന്ദേഭാരത് എക്സ്പ്രസ് സര്വീസ് ഉദ്ഘാടന ചടങ്ങിനിടെ വിദ്യാര്ഥികളെക്കൊണ്ട് ആര്.എസ്.എസ് ഗണഗീതം പാടിപ്പിച്ചതുമായി ബന്ധപ്പെട്ട വിവാദത്തില് സര്ക്കാര് പരിപാടികളില് കുട്ടികളെ രാഷ്ട്രീയവത്കരിക്കുന്നതും ഒരു പ്രത്യേക വിഭാഗത്തിന്റെ വര്ഗ്ഗീയ അജണ്ടകള്ക്ക് ഉപയോഗിക്കുന്നതും ഭരണഘടനാ തത്വങ്ങളുടെ ലംഘനമാണെന്ന് പൊതുവിദ്യാഭ്യാസ മന്ത്രി വി ശിവന്കുട്ടി. പരമപവിത്രമതാമീ മണ്ണില് ഭാരതാംബിയെ പൂജിക്കാന്’ എന്ന് തുടങ്ങുന്ന ഗാനം കുട്ടികൾ പാടിയതിന് പിന്നാലെ നിരവധി ആക്ഷേപങ്ങളാണ് ഉണ്ടായത്. റെയിൽവേ സമൂഹമാധ്യമായ എക്സിൽ പങ്കുവെച്ച ഈ വീഡിയോ പിന്നീട് കളയുകയും ചെയ്തിരുന്നു.
ഈ സംഭവം അതീവ ഗൗരവത്തോടെയാണ് സര്ക്കാര് കാണുന്നതെന്നു മന്ത്രി പറഞ്ഞു. സംഭവത്തിൽ അന്വേഷണത്തിന് ഉത്തരവിട്ടു. ഇത് സംബന്ധിച്ച് ഉടന് റിപ്പോര്ട്ട് സമര്പ്പിക്കാന് പൊതുവിദ്യാഭ്യാസ ഡയറക്ടര്ക്ക് നിര്ദേശം നല്കിയതായും മന്ത്രി അറിയിച്ചു. റിപ്പോര്ട്ടിന്റെ അടിസ്ഥാനത്തില് ആവശ്യമായ തുടര്നടപടികള് സ്വീകരിക്കും. വിദ്യാര്ത്ഥികളെ പങ്കെടുപ്പിച്ച് ഔദ്യോഗിക ചടങ്ങ് നടത്തിയതില് വീഴ്ചയുണ്ടായിട്ടുണ്ടോയെന്നും പരിശോധിക്കും. രാജ്യത്തിന്റെ മതനിരപേക്ഷ ദേശീയത സംരക്ഷിക്കാനുള്ള ഉത്തരവാദിത്വം സര്ക്കാരിനുണ്ടെന്നും, അത് ഉറപ്പുവരുത്തുമെന്നും മന്ത്രി വി ശിവന്കുട്ടി കൂട്ടിച്ചേര്ത്തു.
