ട്രെയിനിൽ യാത്ര ചെയ്യണമെങ്കിൽ ഇനി ബുദ്ധിമുട്ടും : ടിക്കറ്റ് നിരക്ക് വർദ്ധിപ്പിക്കാനൊരുങ്ങി റെയിൽവേ; നടപടി സാമ്പത്തിക പ്രതിസന്ധിയുടെ പശ്ചാത്തലത്തിൽ
സ്വന്തം ലേഖകൻ
ന്യൂഡൽഹി: ഇനി ട്രെയിനിൽ യാത്ര് ചെയ്യണമെങ്കിൽ അല്പം ബുദ്ധിമുട്ടും. ടിക്കറ്റ് നിരക്ക് വർധിപ്പിക്കാൻ ഒരുങ്ങി ഇന്ത്യൻ റെയിൽവേ. നിലവിലെ ടിക്കറ്റ് നിരക്കിൽ നിന്ന് കിലോമീറ്ററിന് അഞ്ച് പൈസ മുതൽ 40 പൈസ വരെ വർധിപ്പിക്കാനാണ് നീക്കം. എ.സി കാറ്റഗറിയിലും അൺ റിസേർവ്ഡ് കാറ്റഗറിയിലും സീസൺ ടിക്കറ്റുകളിലും നിരക്ക് വർധനവ് ഉണ്ടാകുമെന്നാണ് സൂചന.
കഴിഞ്ഞ മാസം തന്നെ പ്രധാനമന്ത്രിയുടെ ഓഫീസ് നിരക്ക് വർധനവിന് അനുമതി നൽകിയിരുന്നു. സാമ്പത്തിക മാന്ദ്യത്തിന്റെ പശ്ചാത്തലത്തിൽ ഇന്ത്യൻ റെയിൽവേ കനത്ത സാമ്പത്തിക പ്രതിസന്ധിയാണ് നേരിടുന്നത്. ഇതിനെ മറികടക്കുന്നതിന് വേണ്ടിയാണ് നിരക്ക് വർധിപ്പിക്കുന്നത്.
Whatsapp Group 1 | Whatsapp Group 2 |Telegram Group
റെയിൽവേയുടെ ചരക്ക് നീക്കത്തിൽ നിന്നുള്ള വരുമാനം ഏപ്രിൽ മുതൽ ഒക്ടോബർ വരെയുള്ള ഏഴ് മാസത്തിനിടെ 19,412 കോടി രൂപയായി കുറഞ്ഞു. ഇതിനു പുറമെ യാത്രാ നിരക്കിൽ നിന്നുള്ള വരുമാനത്തിലും കുറവ് വരുമാനമാണ് രേഖപ്പെടുത്തിയത്. റെയിൽവേ പ്രതീക്ഷിച്ചത് 1.18 ലക്ഷം കോടിയുടെ വരുമാനം ആയിരുന്നെങ്കിലും ലഭിച്ചത് 99,223 കോടി മാത്രമാണ്. ഈ സാഹചര്യത്തിലാണ് റെയിൽവേ ടിക്കറ്റ് നിരക്ക് വർധിപ്പിക്കാൻ ഒരുങ്ങിയിരിക്കുന്നത്.
