ഇടുക്കി: തൊടുപുഴയില് അമ്മയുടെ കാമുകന് എട്ടുവയസുകാരനെ മര്ദ്ദിച്ചു കൊന്ന കേസില് ശനിയാഴ്ച വാദം തുടരും. 17-ന് പ്രതി അരുണ് ആനന്ദിനെ കുറ്റപത്രം വായിച്ചു കേള്പ്പിക്കും. നിലവില് പൂജപ്പുര സെന്ട്രല് ജയിലില് കഴിയുന്ന അരുണ് ആനന്ദിനെ 17-ന് നേരിട്ട് കോടതിയില് ഹാജരാക്കാനാണ് തീരുമാനം. ഇന്ന് കേസ് പരിഗണിച്ചപ്പോള് പ്രതിഭാഗം വാദം കേട്ട ശേഷമാണ് കോടതി തുടര് നടപടികള്ക്ക് ഉത്തരവിട്ടത്. ഇതുവരെ ഓണ്ലൈനായാണ് ഇയാള് കോടതിയില് ഹാജരായിരുന്നത്.
കേസില് അരുണ് ആനന്ദിനൊപ്പം കുട്ടിയുടെ അമ്മയും പ്രതിയാണ്. കുട്ടിയെ മര്ദ്ദിക്കുന്നത് കണ്ടിട്ടും മൗനം പാലിച്ചതും അരുണിന് രക്ഷപെടാന് അവസരമൊരുക്കിയതുമാണ് അമ്മ ചെയ്ത കുറ്റം. കേസില് മാപ്പുസാക്ഷിയാക്കണമെന്ന അമ്മയുടെ അപേക്ഷ പരിഗണിച്ച കോടതി അനുകൂലമായി തീരുമാനമെുക്കുകയായിരുന്നു.
തൊടുപുഴയില് 2019ല് ആണ് നാടിനെ നടുക്കുന്ന സംഭവം അരങ്ങേറിയത്. തൊടുപുഴ അഡിഷണല് സെഷന്സ് കോടതിയാണ് കേസ് പരിഗണിക്കുന്നത്. എട്ടു വയസുകാരന്റെ സഹോദരന് സോഫയില് മുത്രമൊഴിച്ചുവെന്ന് പറഞ്ഞ് പ്രതി അരുണ് ആനന്ദ് ചെയ്ത മര്ദ്ദനം ആണ് മരണത്തിനിടയാക്കിയത്. മര്ദ്ദനം നടന്ന് മുക്കാല് മണിക്കൂറിന് ശേഷമാണ് കുട്ടിയെ ആശുപത്രിയില് കൊണ്ടു പോയത്. സോഫയില് നിന്ന് വീണ് പരിക്കേറ്റെന്നാണ് ആശുപത്രി അധികൃതരോട് കുട്ടിയുടെ അമ്മയും അരുണും പറഞ്ഞത്. കുട്ടിയുടെ അച്ഛനാണ് അരുണെന്നും പറഞ്ഞു.
Whatsapp Group 1 | Whatsapp Group 2 |Telegram Group
എന്നാല് ആശുപത്രി അധികൃതര്ക്ക് ഇതില് സംശയം തോന്നിയതിനാല് അടിയന്തര ചികിത്സ നല്കുന്നതിനൊപ്പം പൊലീസിനെയും വിവരമറിയിക്കുകയായിരുന്നു. പൊലീസെത്തിയപ്പോഴേക്ക് വിദഗ്ധ ചികിത്സയ്ക്കായി കോലഞ്ചേരി മെഡിക്കല് കോളജിലേക്ക് കൊണ്ടുപോകണമെന്ന് ആശുപത്രി അധികൃതര് വ്യക്തമാക്കി.എന്നാല് അരുണ് ഇതിന് തയ്യാറായില്ല. അരമണിക്കൂര് നേരം ആംബുലന്സില് കയറാതെ അരുണ് അധികൃതരുമായി നിന്ന് തര്ക്കിച്ചു. കുട്ടിയുടെ അമ്മയെ ആംബുലന്സില് കയറാന് അനുവദിക്കുകയും ചെയ്തില്ല. ഒടുവില് പൊലീസ് നിര്ബന്ധിച്ചാണ് ആംബുലന്സില് ഇരുവരെയും കയറ്റിവിട്ടത്.
ഒന്നേകാല് മണിക്കൂര് അരുണ് കുട്ടിയുടെ ചികിത്സ വൈകിപ്പിച്ചു. നേരത്തേ കൊണ്ടുവന്നിരുന്നെങ്കില് കുറച്ചു കൂടി വിദഗ്ധ ചികിത്സ കുട്ടിയ്ക്ക് നല്കാനാകുമായിരുന്നെന്ന് ഡോക്ടര്മാരും വ്യക്തമാക്കുന്നു.അതേസമയം, കുട്ടിയെ നിലത്തിട്ട് ചവിട്ടി കാലില് പിടിച്ച് തറയില് അടിച്ച തലച്ചോര് പുറത്തുവന്നപ്പോഴാണ് മര്ദ്ദനം അവസാനിപ്പിച്ചത്. കുട്ടിയുടെ മരണ കാരണം തലയ്ക്കേറ്റ മാരകമായ ക്ഷതം തന്നെയാണെന്ന് പോസ്റ്റുമോര്ട്ടം റിപ്പോര്ട്ടും പറയുന്നു. തലയ്ക്ക് മുന്നിലും പിന്നിലും ചതവുണ്ട്. തലയോട്ടിയുടെ വലതു ഭാഗത്താണ് പൊട്ടല്. വാരിയെല്ലിനും പൊട്ടലുണ്ട്. ശരീരത്തില് ബലമായി ഇടിച്ചതിന്റെ പാടുകളുമുണ്ട്. പോസ്റ്റുമോര്ട്ടം റിപ്പോര്ട്ട് വ്യക്തമാക്കുന്നു.
ഗുരുതരാവസ്ഥയില് ആശുപത്രി കിടക്കയില് പത്ത് ദിവസത്തോളം പോരാടിയ ശേഷമാണ് കുട്ടി മരണത്തിന് കീഴടങ്ങിയത്. കേസില് 2019 മാര്ച്ച് 30-ന് അരുണ് ആനന്ദ് പിടിയിലായി. പൊലീസ് നടത്തിയ അന്വേഷണത്തില് അരുണ് മുന്പും കുട്ടിയെ മര്ദ്ദിച്ചിരുന്നവെന്ന് കണ്ടെത്തിയിരുന്നു.
